Эдэр сылдьан, киһи «акаарытыгар» онно-манна түбэһиэн да сөп, бэйэтэ да киирэн биэриэн сөп. Биэс хонуктааҕыта сүппүт кыыс көстүбүт уонна өссө сымыйалаабыт.
Вера МАКАРОВА, «Саха сирэ» хаһыат, https://edersaas.ru/
Биэс хонуктааҕыта, ол эбэтэр, тохсунньу 11 күнүгэр, Дьокуускай куорат полициятын дьуһуурунай чааһыгар 19 саастаах Виктория Сидорова сураҕа суох сүппүтүн туһунан иһитиннэрии киирбит. Кыыс төрөппүттэрэ кэпсээбиттэринэн, Виктория тохсунньу 8 күнүгэр киэһэ 20.00 чаас саҕана дьиэтиттэн тахсан баран, ууга тааһы бырахпыттыы сүтэн хааалбыт. Эдэр кыыс оҕо сүппүтүн полиция эрэ буолбакка, сонуннары киэҥник тарҕатар уонна социальнай ситимнэринэн көрдөөһүн саҕаламмыта.
Тохсунньу 13 күнэ үүнэр түүнүгэр кыыс дьиэтигэр бэйэтэ тиийэн кэлбит уонна кини доҕоро убайынаан дьиэҕэ хаайан олорбуттарын туһунан кэпсээбит. Киһини күүс өттүнэн хаайыы, уоруу көҥүлү быһыыга тэҥнээх буолан, бу холуобунай дьыалаҕа киирсэр.
Онуоха баара, кинини уорбуттара бигэргэммэтэ: полиция үлэһиттэригэр кыыс билиммитинэн, табаарыс уолун кытта бэйэтэ баҕа өттүнэн барсыбыт, биэс күнү быһа кини кыбартыыратыгар олорбуттар. Суотабай төлөпүөнүн уолун массыынатыгар хаалларан кэбиспит.
Биир киэһэ уол убайа кэлэн, кыыһы көрдүүллэрин эппитигэр, Виктория дьиэтигэр дьэ тиийбит уонна уорбуттарын, хаайан олорбуттарын туһунан сымыйалаабыт.
Бу чахчынан хомуллубут матырыйааллары полиция РФ СК Саха сиринээҕи управлениетыгар ыыппыт. Бу туһунан Дьокуускай куорат полициятын пресс-сулууспата иһитиннэрдэ.
Вера МАКАРОВА, «Саха сирэ» хаһыат, https://edersaas.ru/
Хаартыска: интернеттэн