Михаил Мишустин вакцинаны тиэрдии быстах быраабылатын бигэргэтэргэ соруйда
Бырабыыталыстыба Бэрэссэдээтэлэ Михаил Мишустин коронавирус саҥа инфекциятын сэрэтиигэ вакцинаны тиэрдии боппуруоһун сүрүннүүр быстах санитарнай-эпидемиологическай быраабылалары оҥорууга уонна бигэргэтиигэ биир нэдиэлэни биэрдэ.
Сорудаҕы Роспотребнадзорга, Доруобуйа харыстабылын министиэристибэтигэр уонна Юстиция министиэристибэтигэр сүктэрдэ. Бу сорудаҕы ахсынньы 8 күнүгэр диэри толоруохтаахтар.
Вакцинаны тиэрдии тиэмэтэ ахсынньы 1 күнүгэр сүрүннүүр сэбиэт мунньаҕар дьүүллэһилиннэ. Доруобуйа харыстабылын министиэристибэтин баһылыга Михаил Мурашко Бырабыыталыстыба Бэрэссэдээтэлигэр эрэгийиэннэргэ препараты тиэрдии суола-ииһэ (логистиката) торумнаммытын эттэ. Вакцинаны тутар ыскылааттар бэлэмнэр.
Михаил Мишустин сорудаҕынан губернатордар дьиэлэригэр эмтэнэ олорор дьону сөптөөх эминэн хааччыйыыны салгыахтаахтар.
Сүрүннүүр сэбиэт мунньаҕар Михаил Мишустин коронавирус балаһыанньата билигин даҕаны биир дэхситэ суох иһэрин бэлиэтээтэ. Балаһыанньа уустук сирдэригэр хааччахтыыр миэрэлэри сорунуулаахтык ылынарга сүбэлээтэ.
РФ Бырабыыталыстыбатын пресс-сулууспата
Женни Стрюкова бэлэмнээтэ.
Хаартыска: тустаах саайтан