Михаил Сивцев Дьокуускай куорат 26-с оскуолатын үөрэнээччилэригэр уруок ыытта
Ыам ыйын 7 күнүгэр Zoom платформанан Улуу Кыайыы 75 сылыгар аналлаах “Память горя сурова, память славы жива…” диэн эр санаа онлайн уруога буолла.
Дьокуускай куорат 26-с нүөмэрдээх оскуолатын учууталлара уонна үөрэнээччилэрэ СӨ Үөрэҕин уонна наукатын миниистирин эбээһинэһин толороччу Михаил Сивцевы кытта, кыргыһыы хонуутугар төрөөбүт дойдуларын көмүскээбит, үүнэр көлүөнэҕэ “күөх халлааны бэлэхтээбит” дьону ахтан-санаан аастылар.
Михаил Сивцев Кыайыы 75 сылынан барыларын бырааһынньыгынан эҕэрдэлээтэ. Үөрэнээччилэргэ туһаайан сэрии дьоруойдарын өйдүү-саныы сылдьарга улахан болҕомто ууруохтаахпыт диэн эттэ. “Дьоруойдар тустарынан, олус элбэх дьон олоҕун илдьэ барбыт сэрии аны хаһан даҕаны хатыламматын туһугар өйдүөхтээхпит. Чахчы, биһиги биир дойдулаахтарбыт аатырбыт снайпер, аппысыар, хорсун саллаат этилэр. Кинилэр хорсун быһыылара, мин санаабар, сэрии туһугар буолбакка, бэйэлэрин дьиэ кэргэттэрин уонна судаарыстыбаларын көмүскүүргэ бэлэмнэригэр, туруналларыгар көстөр. Ким даҕаны сэрии буоларыгар баҕарбатаҕа, баҕарбат. Ол гынан баран, оҕолор, бары боппуруоһу эйэлээхтик быһаарсар ирдэнэр”, — диэн санаатын үллэһиннэ.
Дьокуускай куорат 26-с нүөмэрдээх оскуолатын дириэктэрэ Айаан Васильев Улуу Кыайыы туһунан өйдөбүл — хас биирдии гражданин ытык иэһэ диэн бэлиэтээтэ. “Саллааттар кыайыыны хас биирдии кирбиигэ, фроҥҥа уонна тыылга турунан чугаһаппыттара. Биһиги дойдубутугар сэрии бэйэтин ыар суолун хаалларбатах дьиэ кэргэнэ суоҕун тэҥэ. Саха сириттэн 62091 киһи ыҥырыллыбытыттан, 23 тыһыынча кэриҥэ эрэ эргиллибитэ. Дьулаан сыыппара. Ити түгэн хатыламмата биһигиттэн тутулуктаах”, — диэн дириэктэр эттэ.
Уруок кэмигэр үөрэнээччилэр уонна учууталлар бэйэлэрин дьоруойдарын – эһээлэрин, эбээлэрин, сэрии сылларыгар дойдуларын көмүскээбит дьон туһунан кэпсээтилэр. 5-с кылаас үөрэнээччитэ Женя Семенов 1942 сыл ыам ыйыгар аармыйаҕа ыҥырыллыбыт эһэтин Самсонов Ефим Григорьевич туһунан кэпсээтэ. Кини 252-с стрелковай дивизия 932-с стрелковай полкатын рядовойа эбит. Харьковы босхолооһуҥҥа, Днепры туорааһыҥҥа кыттыбыт, Белоруссияҕа, Польшаҕа, Арҕаа Пруссияҕа сэриилэспит. Кыайыы күнүн Берлиҥҥэ көрсүбүт.
Ити таһынан, 5 “е” уонна 9 “д” кылаас үөрэнээччилэрэ оскуола түмэлин көрдөөһүҥҥэ үлэтин билиһиннэрдилэр. Манна үлэлэһэр үөрэнээччилэр этэллэринэн, 32 тыһыынча Саха сириттэн төрүттээх дойдуларыгар эргиллибэтэх саллааттан 7 тыһыынча киһи сураҕа суох сүппүт. “Биһиги 4 сэриигэ кыттыбыт дьон дьиэ кэргэнигэр ханна көмүллэ сыталларын уонна бырааттыы көмүүлэригэр бара сылдьалларыгар көмөлөспүппүт”, — диэн кыттааччылар этэллэр. Бэлиэтээн аастахха, 26-с нүөмэрдээх оскуола түмэлэ “Оскуола кыраайы үөрэтэр бастыҥ түмэлэ-2020” Бүтүн Арассыыйатааҕы куонкурус эрэгийиэннээҕи түһүмэҕин “Аҕа дойду Улуу сэриитигэр куорат оскуолаларын бастыҥ түмэлэ” номинациятын кыайыылааҕа.
Михаил Сивцев, СӨ Үөрэҕин уонна наукатын министиэристибэтэ быйыл Улуу Кыайыы 75 сылыгар кэккэ тэрээһиннэри, ол иһигэр OneClick “Я вернусь” кыттыгас куонкуруһу ыытар диэн иһитиннэрдэ. Бу күннэргэ куонкуруһу 2020 сыл күһүнүгэр диэри уһаппыттарын эттэ. “Бу, биһиги дойдубутугар улахан суолталаах түгэҥҥэ — Улуу Кыайыы 75 сылыгар улахан болҕомто уурулларын туһугар оҥоһуллар, бэлиэтээһин сылы эргиччи барар”, — диэтэ.
Михаил Сивцев кэллиэгэлэрэ уруокка ыҥырбыттарыгар махталын биллэрдэ уонна оскуола ыытар тэрээһиннэригэр кыттарга уонна салгыы бииргэ таһаарыылаахтык үлэлииргэ бэлэмин биллэрдэ.
СӨ Үөрэҕин уонна наукатын пресс-сулууспата.