Михаил Присяжнай: “Билимҥэ судаарыстыбаннай бырагыраама ылыллыбыта суолталаах”
СӨ Үөрэҕин уонна наукатын миниистирин бастакы солбуйааччы Михаил Присяжнай социальнай ситимнэринэн быһа сибээскэ тахсан, көрөөччүлэр билимҥэ сыһыаннаах ыйытыыларыгар хоруйдаата.
Санатан эттэххэ, быйылгы сылы дойду бэрэсидьиэнэ Владимир Путин Арассыыйаҕа Билим уонна технология сылынан биллэрбитэ.
Көрөөччүлэр судаарыстыбаннай бырагыраама туһунан туоһуласпыттарыгар: “Быһа холуйан балтараа сыл анараа өттүгэр Ил Дархан Айсен Николаев билими сайыннарыыга туспа судаарыстыбаннай бырагырааманы оҥорууга сорудах биэрбитэ. Онно олоҕуран, Саха Өрөспүүбүлүкэтин туспа бырагыраамата ылыллыбыта. Ил Дархан былырыын ыйаахха илии баттаабыта. Бастатан туран, араас хайысхалары сайыннарыыга үгүөрү үбүлээһиннээх. Итиэннэ ыччаты билимҥэ сыһыарыы эмиэ киирэр.
Биһиги көрүүбүтүнэн, хас даҕаны интэриэһинэй хайысхалардаах – бу фундаментальнай, прикладной чинчийиилэри өйөөһүн, наставничество институтун сайыннарыы бырагыраамата, о.д.а. Тустаах бырагыраамаҕа научнай оскуолалары анаалыстаан уонна олору өйүүр миэрэлэри көрдүбүт. Биһиэхэ өрөспүүбүлүкэҕэ, уопсайынан, аан дойдуга курдук сайдыы, атаҕар туруу, ситии, уостуу эргиирэ (цикл) баар. Маныаха, бастатан туран, магистратура, аспирантура бырагыраамаларынан каадыры бэлэмнээһиҥҥэ, научнай чинчийиилэргэ өйөбүл ирдэнэр. Итиэннэ судаарыстыбаннай бырагыраама суолталаах блогунан уопсастыбаннай сакаас буолар”, — диэн Михаил Присяжнай эттэ. Кини, бу нэһилиэнньэни долгутар боппуруостарга чинчийии ыытыы буоларын ыйар. Холобура, Алдан оройуонугар радон уотунан тыктарыыны ылыы, Ньидьили күөл уутун таһымын тэҥнээн биэрии (регулирование), Бүлүү бөлөх улуустарын нэһилиэнньэтин йодунан хааччыйыы, о.д.а. чинчийиилэр диэн этэр. Судаарыстыбаннай бырагыраама баар буолуута улахан суолталааҕын бэлиэтиир.
Людмила ПОПОВА, “Саха сирэ” хаһыат, edersaas.ru