«Сахамедиа» холдинг тэрийэр «Саха сирин киэн туттуута – 2019» норуот бириэмийэтигэр «Урбаанньыт» түһүмэххэ интэриниэт нөҥүө 2970 куолаһы ылан, Михаил Охлопков кыайбыта.
edersaas.ru
Норуот бириэмийэтин кыайыылааҕа Михаил Охлопков 1986 сыллаахха оскуоланы бүтэрэн баран Москватааҕы гидромелиоративнай институкка киирбитэ. Үлэтин «Сахавнешстрой» тэрилтэҕэ инженеринэн саҕалаабыта. Ол кэмнэргэ Мэдиссиинэ киинин, Комдрагмет дьиэтин, «Тыгын Дархан» гостиницаны, Саха тыйаатырын, КФЕН курдук о.д.а улахан эбийиэктэри тутан таһаарбыттара.
2002 сыллаахха чааһынай тутууга көһөн, эһиилигэр «Адгезия» тэрилтэни тэрийбитэ. Михаил Филиппович биир санаалаах дьонун түмэ тардан, аан бастаан кыра сакаастартан саҕалаан, улахан судаарыстыбаннай сакаастарга тиийэ тутуу бырайыактарынан дьарыктаналлар.
«Холобур, бүддьүөт харчытыгар тутууну ыытарга 44 №-дээх федеральнай сокуон Арассыыйа киэҥ киэлитин үрдүнэн тутааччыларга тэҥ усулуобуйаны биэрэр. Ол эрэн, эрэгийиэн аайы ити тус-туһунан. Биһиги үлэһиттэрбитигэр хотугу эбилик, оройуоннааҕы коэффициент уонна 24 күннээх эбии уоппуска төлүөхпүтүн наада. Дойду үрдүнэн биир эйгэҕэ үлэлии сылдьабыт эрээри, ирдэбил тус-туһунан, ону тэҥниэххэ баар этэ. Маны таһынан, бүддьүөт харчытын харыстаан, кэмчилии сатаан, тутуу ороскуотун кыччатан, түмүгэр мөлтөх хаачыстыбалаах дьиэ тутуллан тахсар, кэлин ону көрөргө-истэргэ ороскуот улаатар.
Өссө биир кыһалҕа оробуочай илии тиийбэтэ. Тутууга элбэх киһи үлэлиир, инженердэр, оробуочайдар үлэлэриттэн хайдах дьиэ тутуллара улахан тутулуктаах. Билигин үрдүк хамнастаах оробуочай интэлигиэнсийэни иитэн таһаарыахха наада. Биһиги тутуу техникумун кытта сөбүлэһии түһэрсэн, үлэһиттэри бэлэмнииргэ бииргэ үлэлэһэбит, сыл ахсын аттестация ыытабыт. Инникитин үлэни бириэмэнэн уонна таһымынан (квалификациятынан) көрөн төлүүр ньымаҕа көһөр санаалаахпыт», — диэн кэпсиир «Адгезия» хампаанньа салайааччыта Михаил Охлопков.
Марианна Тыртыкова, «Саха сирэ», edersaas.ru