Ааһан эрэр сыл бүтэһик ыйыгар Карелия Өрөспүүбүлүкэтин доруобуйа харыстабылын миниистиринэн Саха сиригэр доруобуйа харыстабылын миниистиринэн үлэлээбит Михаил Охлопков анаммыта. Бу иннинэ Карелия Доруобуйаҕа харыстабылын министиэристибэтин Марина Швец биир эрэ сыл салайда.
edersaas.ru
Исписэлиистэр бэлиэтииллэринэн, 2020 сылга Карелия Өрөспүүбүлүкэтин 100 сыллаах үбүлүөйэ бэлиэтэнээри уонна өр күүтүүлээх Перинатальнай киин аһыллаары турдаҕына, бэйэлэрин миниистирдэрин уларыта охсуохтара суоҕа диэн эрэл санаалаах олорбуттар. Ол гынан баран, Карелия баһылыга Артур Парфенчиков бирикээһинэн анаммыт саҥа миниистир Михаил Егоровиһы бырабыыталыстыба премьер-миниистирин солбуйааччы Игорь Корсаков биир идэлээхтэригэр билиһиннэрдэ.
Михаил Охлопков “Биһиги доруобуйа харыстабылын элбэх хайысханан сайыннарыахпыт. Ол эбэтэр, бастатан туран, доруобуйа харыстабылын акылаатын – бастакы сүһүөх медицинскэй-санитарнай көмөнү салгыы сайыннарыахпыт. Үлэһит ахсаана тиийбэтин туоратарга каадыр бэлиитикэтин бөҕөргөтүөхпүт. Булгуччулаах усулуобуйанан эминэн хааччыллыы уонна медицинскэй көмө өҥөтүн тупсарыы буолуоҕа. Өссө биир сүрүн хайысха – үрдүк технологиялаах уонна ыарыһаҕы чинчийэргэ, эмтииргэ малоинваливнай ньымалары туһаныы. Миэхэ икки бүк эппиэтинэс сүктэрилиннэ: мин Карелия Өрөспүүбүлүкэтин эрэлин уонна элбэх омуктаах Сахам сирин аатын-суолун түһэн биэрэр быраабым суох. Иннибэр ыарахан уонна быыччык үлэ күүтэр”, – диэн Михаил Охлопков министиэристибэ кэлэктиибин кытары билсэригэр эттэ.
Ону сэргэ, ахсынньы 14 күнүгэр, Петрозаводск куоракка Перинатальнай киин үөрүүлээх быһыыга-майгыга аһылынна (Саха сиригэр быйыл кулун тутарга Михаил Охлопков кыттыылаах аһыллыбыта). Маннык Перинатальнай кииннэр РФ Президенин 2013 с. дьаһалынан дойду 30 регионугар тутуллуохтаахтар.
Киин аһыллыытыгар Арассыыйа доруобуйаҕа харыстабылын миниистирэ Вероника Скворцова бэйэтинэн кытынна. Бу сырыы кэмигэр биир дойдулаахпыт Михаил Охлопков федеральнай миниистиртэн саҥа киини ЭКО-ҕа аналлаах тэрилинэн хааччыйарга (көмө репродуктивнай технологиялары сайыннарарга) көрдөстө уонна өрөспүүбүлүкэҕэ оҕо төрөөһүнүн элбэтиигэ улахан көмөлөөх буолуоҕун бэлиэтээтэ.
Манна сыһыаран эттэххэ, Петрозаводскайга ЭКО-ны чааһынай тэрилтэлэр эрэ оҥороллор. Вероника Скворцова өрөспүүбүлүкэ былаастара, Киини бырайыактааччылар хара бастакыттан ону учуоттуохтаахтарын, онуоха Михаил Егорович кэлиэн иннинээҕи салалта буруйдааҕын санатта. “Ити кыаллыбатах өрүтү бары бииргэ толкуйдуохпут. ЭКО-нан чааһынай тэрилтэлэр эрэ дьарыктаналларын таһаарыа суохтаахпыт”, —— диэн саҥа миниистиргэ эрэнэрин уонна кини Саха Өрөспүүбүлүкэтигэр үлэтин-хамнаһын үчүгэйдик билэрин уонна сыаналыырын туһунан бэлиэтээн эттэ.
Экэниэмикэ, социальнай быһыы-майгы өттүнэн уустук балаһыанньалаах региоҥҥа биһиги биир дойдулаахпыт ситиһиилээхтик үлэлиэҕэр, бэйэтин баай билиитин-көрүүтүн, уопутун туһаныаҕар, Сахатын сирин ааттата туруоҕар эрэлбит улахан.
Надежда ЕГОРОВА, “Саха сирэ” хаһыат, edersaas.ru