Михаил НИКОЛАЕВ, Саха Өрөспүүбүлүкэтин бастакы бэрэсидьиэнэ:
— Ытыктабыллаах Сахам сирин дьоно! Биһиэхэ барыбытыгар дьоһуннаах, олус улахан суолталаах кэм кэллэ. Дьону-сэргэни биир сыалга-сорукка түмэр сүрүн быыбар – Россия бэрэсидьиэнин талар күммүт үүнэр. Биһиги, Саха сирин олохтоохторо, бу бэлитиичэскэй тэрээһиҥҥэ көхтөөхтүк кыттарбыт наада. Сомоҕолоһон, дойдубут бэрэсидьиэнин талыыга өрөйөн-чөрөйөн биэриибититтэн, аан дойду Россияҕа сыһыана олус тутулуктаныаҕа. Онон бары кэлэн куоластаан, бэйэбит судаарыстыбаннаспытын харыстыырбытын, сайдыыбытын туруулаһарбытын өссө биирдэ бигэргэтиэхтээхпит.
Маннык олохпутугар сүдү суолталаах кэмҥэ ыһылларбыт, хайдыһарбыт табыллыбат! Биири тоһоҕолоон бэлиэтиэм этэ — кэхтиини кэтэһэр, куһаҕаны күөттүүр дьон тылын ылыныа суохтаахпыт.
Онон, буолаары турар быыбарга биһиги Улуу Россиябыт туһугар куоластыахха! Дойдубут социальнай-экономическай туруга бигэ тирэхтэнэн, инники диэки өссө тэтимнээхтик сайдан иһэр. Ол барыта күүстээх салайааччыттан тутулуктаах. Саха сирэ өрүү Россиялыын бииргэ буолуоҕа!
Ытыктабыллаах бар дьонум, кэскилбит туһугар, ытык иэскитин толорон, Россия бэрэсидьиэнигэр куоластыыргытыгар ыҥырабын.
Сахам дьоно, кэлэн быыбардааҥ!
https://www.instagram.com/p/BgSr1zUlmw9/?taken-by=edersaas.ru