Саха сирин бастакы бэрэсидьиэнэ, СӨ Судаарыстыбаннай сүбэһитэ М.Е.Николаев “Билиигинэн — кыайыаҥ” анал истипиэндьийэтин быйыл 18-с төгүлүн туттарда. Өрүү буоларыныы, тэрээһин өрө көтөҕүллүүлээхтик ааста.
edersaas.ru
Урутаан эттэххэ, Михаил Николаев анал истипиэндьийэтэ быйылгыттан норуоттар икки ардыларынааҕы таһымҥа таҕыста. Ол курдук, Саха сиригэр оҕону иитиигэ, сайыннарыыга сүҥкэн кылааттарын киллэрсэр тас дойду педагогтарыгар эмиэ туттарыллар буолла.
Бу сыллар тухары үрдүк маастарыстыбалаах, саҥаны киллэрэр 57 педагогка, 42 айдарыылаах, талааннаах ыччакка туттарылынна. Кинилэр бары Арассыыйаҕа, тас дойдуга тиийэ араас эйгэҕэ бэйэлэрин көрдөрөр, төрөөбүт дойдуларын суон сураҕырдар дьон.
Истипиэндьийэни туттарыы үөрүүлээх чааһыгар Ил Түмэн бэрэссэдээтэлэ Петр Гоголев, СӨ бырабыыталыстыбатын бэрэссэдээтэлин солбуйааччы Ольга Балабкина, СӨ үөрэҕин уонна наукатын миниистирэ Владимир Егоров, СӨ Судаарыстыбаннай сүбэһитэ Андрей Борисов, “Билиигинэн — кыайыаҥ!” анал истипиэндьийэ уопсастыбаннай хамыыһыйатын чилиэннэрэ, педагогтар, үөрэнээччилэр бааллар, Михаил Ефимовичка бэйэлэрин эҕэрдэлэрин тиэртилэр.
Корея бырабыыталыстыбатын аатыттан Корея университетын бэрэпиэссэрэ, СӨ Муусука үрдүкү оскуолатын ректорын сүбэһитэ Но То Чол биһигини искусство сомоҕолуур диэн бэлиэтээн туран, Михаил Ефимовичка бочуотунай кырааматаны кытта үрүҥ көмүс бэлиэни туттарда.
“Билиигинэн — кыайыаҥ!” анал истипиэндьийэ лауреаттарын аатыттан махтал тылы Сунтаардааҕы политехническэй лиссиэй физикаҕа учуутала Римма Алексеева эттэ. Михаил Ефимовичка туһаайан: “Махтанабыт. Бу истипиэндьийэни эн илиигиттэн ыларбытыттан үөрэбит. Биһиги, эн курдук, төрөөбүт дойдубут талааннарынан баай дии саныыбыт. Эн олохтообут истипиэндьийэҥ биһиэхэ инникитин сайдарбытыгар көҕүлүүр күүс буолар”, — диэн тиэртэ.
СӨ Үөрэҕин уонна наукатын министиэристибэтэ тустаах тэрээһин чэрчитинэн сыллата араас тэрээһиннэри ыытар. Ол курдук, быйыл Но То Чол (Корея), Данил Пупов (Москва), Сергей Деминов (Нерюнгри) үөрэнээччилэргэ уонна педагогтарга анаан араас тиэмэҕэ лиэксийэлэри аахтылар.
Аксинья уонна Наталья Посельскаялар ааттарынан Балет оскуолатын (кэллиэс) 2-с кууруһун устудьуона Иван Матвеев:
—Балет оскуолатыгар төрдүс кылаастан киирбитим. Оҕо эрдэхпинэ үҥкүүлүүрбүн сөбүлүүрүм. Эбээм Галина Федотовна Федотова араас куруоһуоктарга сырытыннарбыта. Ол курдук, бальнай, спортивнай үҥкүүлэринэн дьарыктаммытым. Бэйэтэ төһө да үҥкүү кэрэ эйгэтиттэн ырааҕын иһин, мин үҥкүүнү сэҥээрэрбин бэлиэтии көрдөҕө. “Билиигинэн — кыайыаҥ!” истипиэндьийэҕэ тиксибиппиттэн олус үөрэбин, киэн туттабын. Маныаха төрөппүттэрбэр, педагогтарбар уонна үөрэҕим тэрилтэтигэр махталбын тиэрдэбин, — диир.
Манна даҕатан эттэххэ, Иван убайа, Л.А.Ким аатынан Оҕо ойуулуур-дьүһүннүүр искусствотын оскуолатын преподавателэ Егор Степанов эмиэ М.Е.Николаев анал истипиэндьийэтин ылла.
“Билиигинэн — кыайыаҥ!”- 2018 лауреаттара
- Алексеева Римма Григорьевна (Сунтаардааҕы политехническэй лиссиэй учуутала)
- Деминов Сергей Иванович (Нерюнгритааҕы 24-с нүөмэрдээх информационнай-технологическай лиссиэй учуутала)
- Пупов Данил Владимирович (АНА молекулярнай генетикаҕа институтун старшай научнай үлэһитэ, Москва)
- Патрик Хак Чанг Лам (Базель групп, үөрэх тэрилтэлэрин салайааччыта, Гонконг бырабыыталыстыбатын сүбэһитэ)
- Степанов Егор Егорович (Л.А.Ким аатынан Оҕо ойуулуур-дьүһүннүүр искусствотын оскуолатын преподавателэ, Дьокуускай)
- Но То Чол (СӨ Муусука үрдүкү оскуолатын ректорын сүбэһитэ, Дьокуускай)
- Балакирев Илья (Уус Ньаратааҕы гимназия 10-с кылааһын үөрэнээччитэ)
- Малышев Владислав (Бүлүүтээҕи 1-кы нүөмэрдээх оскуола 9-с кылааһын үөрэнээччитэ)
- Матвеев Иван (Аксинья уонна Наталья Посельскаялар ааттарынан Балет үрдүкү оскуолатын 2-с кууруһун устудьуона).
Людмила ПОПОВА, “Саха сирэ” хаһыат, edersaas.ru
Андрей СОРОКИН (СИА) хаартыскаҕа түһэриилэрэ.