Бэҕэһээ, балаҕан ыйын 21 күнүгэр, Бырабыыталыстыба Бэрэссэдээтэлэ Михаила Никифоров Узбекистан Сырдарьятааҕы уобалаһын хокимын солбуйааччы Данияр Мадиримов баһылыктаах дэлэгээссийэни кытары көрүстэ.
Көрсүһүүгэ бииргэ үлэлээһин боппуруостара көрүлүннэ. Михаил Никифоров ыалдьыттарга өрөспүүбүлүкэ туһунан кэпсээтэ, араас омук дьоно иллээхтик олороллорун, ол иһигэр үс тыһыынча кэриҥэ узбек баарын эттэ. Узбекистаҥҥа өрөспүүбүлүкэ өттүттэн интэриэс оҕуруот аһыгар, фруктаҕа уонна текстилгэ улаханын бэлиэтээтэ. Логистика төһө да уустук буоллар, быйыл аан бастаан Узбекистантан оҕуруот аһа уонна фрукта Арктикаҕа тиэрдиллибитин кэпсээтэ.
Данияр Мадиримов «Сахабулт» премиум-кылаастаах бородууксуйатын узбек ырыынагар таһаарыахха, Сырдьарья уобалаһыгар Саха Өрөспүүбүлүкэтин бородууксуйатын, Дьокуускайга Узбекистан бородууксуйатын атыылыыр эргиэн киинин арыйыахха сөбүн эттэ.
Узбекистан Сырдарьятааҕы уобалаһын хокимын солбуйааччыта Данияр Мадиримов салайаачылаах дэлэгээссийэ Саха сиригэр эргиэн-экэниэмикэ өттүгэр бииргэ үлэлээһини сөргүтэр сыаллаах Узбекистан Владивостокка баар Генеральнай консульствотын көҕүлээһининэн кэлэ сырытта. Дэлэгээссийэ састаабыгар Сырдарья уобалаһын, Сардабинскай, Гулистанскай, Сырдарьинскай уонна Хавастскай оройуоннай хокиаттарын итиэннэ чэпчэки бырамыысыланнас, оҕуруот аһын уонна фрукта, балыктааһын эйгэтин бэрэстэбиитэллэрэ бааллар. Кинилэр «Якутопторг», «Дьокуускайдаҕы үүт собуота», «Скиф» хампаанньаларга, «Якутия», «Сахабулт» ҮАПК АУоларга, «Саюри» тэпилииссэ комплексыгар сырыттылар диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ». edersaas.ru
Марии Васильева, ЯСИА хаартыскаҕа түһэриитэ.