Михаил Никифоров Сунтаар оройуонугар успуорт-чэбдигирии комплексын тутуутун көрдө
Өрөспүүбүлүкэ бырабыыталыстыбатын бэрэссэдээтэлин солбуйааччы Михаил Никифоров Сунтаар оройуонугар оробуочай сырыытын кэмигэр Хордоҕой сэлиэнньэтигэр успуорт-чэбдигирии комплексын тутуутун билистэ. Билигин бу эбийиэк 40 бырыһыан бэлэм, диэн Саха сирин Тыа хаһаайыстыбатын саайтыгар суруллар.
Икки этээстээх 700 кв.м иэннээх дьиэҕэ бырайыак быһыытынан эрчиллэр уонна тустар саалалар, мэдиссиинэ кэбиниэтэ уонна араас хостор баар буолуохтара. Өссө пандус оҥоруохтара.
“2020-2025 сылларга тыа сирин сирин-уотун кэлимсэ сайыннарыы” өрөспүүбүлүкэтээҕи судаарыстыбаннай бырагыраама “Тыа сирин аныгы мөссүөнэ” сүрүн тэрээһинин чэрчитинэн ыытыллар. Эбийиэги үбүлээһин кээмэйэ – 53 мөлүйүөн солкуобай, федеральнай бүддьүөттэн 51 мөлүйүөн солк. көрүллүбүтэ, өрөспүүбүлүкэ хааһынатыттан – 700 тыһ. солкуобай. Бу тутууну “Тиит” СК ХЭТ тутар.
Билигин дьиэ олоҕун кутуу, ЛСТК таҥыы, күрүөлээһин түмүктэммит. “Тиит” тэрилтэ генеральнай дириэктэрэ Николай Теплоухов кэпсииринэн, билигин дьиэ каркааһын таҥыы ыытыллар, сэндвич-панеллары туруоруу саҕаланар. Тутуу матырыйаала 80 бырыһыана тиэрдилиннэ.
Эбийиэги быйыл ахсынньыга киллэриэхтэрэ.
Ил Дархан уонна бырабыыталыстыба дьаһалтатын пресс-сулууспата.
Бэлэмнээтэ Женни Стрюкова
Хаартыска: саайтан