Михаил Никифоров санитарнай-эпидемиологическай ирдэбиллэри тутуһуу туһунан кэпсээтэ

Өрөспүүбүлүкэҕэ атыы-эргиэн эбийиэктэригэр, уопсастыбаннай аһыыр сирдэргэ санитарнай-эпидемиологическай ирдэбиллэри хонтуруоллуур тэрээһиннэр салҕаналлар. Муус устар 26 күнүттэн ыам ыйын 9 күнүгэр диэри барыта 1276 рейдэ оҥоһулунна. Бу туһунан СӨ Бырабыыталыстыбатын бэрэссэдээтэлин солбуйааччы Михаил Никифоров бүгүҥҥү брифинигэр иһитиннэрдэ.

Хонтуруоллуур тэрээһиннэр Алдаҥҥа, Булуҥҥа, Кэбээйигэ, Ленскэйгэ, Мэҥэ Хаҥаласка, Мииринэйгэ, Намҥа, Ньурбаҕа, Өлүөхүмэҕэ, Сунтаарга, Хаҥаласка, итиэннэ Дьокуускайга уонна Жатайга ыытылыннылар.

Вице-премьер этэринэн, бу кэмҥэ өрөспүүбүлүкэ үрдүнэн 39 комиссионнай көрүү аактата, 1 сэрэтии, 7 ыйыы, 15 административнай кэһии туһунан боротокуолу суруйбуттар.

Дьокуускай куорат административнай хамыыһыйата 722 атыы-эргиэн эбийиэгэр, 207 аһыыр сиргэ, 15 өҥөнү оҥорор, 43 сынньалаҥы тэрийэр сиргэ, 3 фитнес-кииҥҥэ сылдьан, барыта 990 бэрэбиэрэкэни ыытта. Бу түмүгэр 1 административнай кэһии туһунан дьыала суукка барда.