Михаил Никифоров: Кэтэхтэр бары кэриэтэ судаарыстыба көмөтүн ылар буоллулар

Ааптар: 
Бөлөххө киир:

«Саха сирэ» хаһыат сүрүн эрэдээктэрэ Чокуур Гаврильев “Сэмсэ санаа” биэриигэ СӨ бырабыыталыстыбатын бэрэссэдээтэлин солбуйааччы Михаил Никифоровтыын тыа хаһаайыстыбатын сайдыытын, оттооһун, үүтү туттарыы, оҥорон таһаарыы туһунан кэпсэттэ.

Үүт уонна ынах төбөтүгэр бэриллэр субсидия туһунан ыйытыкка, вице-премьер билигин бу мэхэньиисими үөрэтэ сылдьалларын, сотору кэминэн кэккэ этиилээх бырабыыталыстыбаҕа тахсыахтаахтарын туһунан эттэ.

— Ыраах сытар нэһилиэктэргэ үүт тутар пууннар үлэлээбэттэринэн уонна атын да төрүөттэринэн сылтаан, кэтэх ыаллар бары үүтү туттарбат этилэр.  Инньэ гынан, кэтэх хаһаа­йыстыбалаах ыаллары өйүүр, дохуот ааҕыстыннар уонна ыанар ынах ахсаанын тутар сыалтан, саҥа мэхэньиисими киллэрбиппит. 2020 сыллаахха ааҕан көрүүбүтүнэн, кэтэх хаһаайыстыбалаах дьонтон 30%-ра үүт-эт туттаран дохуот аахсыбат этилэр. Дьэ билигин бары хабылыннылар, ким эрэ субсидия ылар, ким эрэ үүт туттаран дохуот аахсар, — диир Михаил Викторович.

Михаил Никифоров түмүккэ санаатын үллэстэригэр, урут тыа хаһаайыс­тыбатыгар көйгө оҕоҕо курдук сыһыан баарын санатта. Ол гынан баран, кэнники сылларга Арассыыйа үрдүнэн да ыллахха, тыа хаһаайыстыбата аһара балысханнык сайынна.

«Саха сирин ылар буоллахха, тыа хаһаайыстыбатыгар бу сылга үктэнэрбитигэр бырагыраамабыт үбүлээһинэ 12,5 млрд солк. Бу билигин өссө эбиллэн 13,5 млрд солк. буолла. Ити балысхан улахан үбүлээһин. Маны көдьүүстээхтик туһаныахпытын наада. Онон, Тыа хаһаайыстыбата хаалыы­лаах салаа буолбакка, күүскэ сайдар хайысхаҕа кубулуйда. Дохуот ылар үчүгэй биисинэс курдук көрөр буоллулар», — диир вице-премьер.

https://www.youtube.com/watch?v=xIjX3iEM5Ug

Биэриини бүгүн киэһээ 18.10 мүн. Саха НКИХ ханаалыгар көрөөрүҥ. Сарсын хаһыакка тахсыаҕа.

«Саха сирэ» хаһыат

+1
0
+1
0
+1
0
+1
0
+1
0
+1
0
+1
0