Киин сиртэн ыраах сытар суола-ииһэ суох нэһилиэнньэлээх пууннарга, хотугу улуустарга былааннаммыт таһаҕас барыта тиэрдиллиэҕэ. Бу туһунан бүгүн СӨ бырабыыталыстыбатын бэрэссэдээтэлин солбуйааччы Михаил Никифоров суруналыыстары кытары көрсүһүүтүгэр иһитиннэрдэ.
– Хотугу улуустарга уу суолунан таһаҕаһы таһыыга бэлэмнэнии күүскэ бара турар. Арктика сайдыытын министиэристибэтэ манна үлэлэһэ сылдьар. Хотугу улуустарга тиэрдиллиэхтээх ас-үөл, таһаҕас кээмэйэ быйыл кыччаабат, былааннаммытын курдук барыта барыаҕа. Үп-ас манна көрүллэн турар. “Якутоптторг” тэрилтэ уу суолунан таһаҕаһы таһыы саҕалыан иннинэ, ол эбэтэр от ыйыгар диэри, барытын бэлэмниэҕэ. Быйыл Хотугу муустаах муора суолунан эмиэ таһаҕас кэлиэхтээх. Онон билигин таһаҕас кээмэйигэр буолбакка, сыанатыгар турар. Элбэх таһаҕаһы ылар буоламмыт манна биһиги сүүйүүлээхпит дии саныыбын. Элбэҕи чэпчэки соҕуска ылан, тырааныспар ороскуотугар субсидия көрөн нэһилиэнньэҕэ наһаа ыараабатах таһаҕаһы тиэрдиэхпит, – диэн этэр Михаил Викторович.
Санатан эттэххэ, Ил Дархан Айсен Николаев бу күннэргэ аһынан-үөлүнэн эргинэр предпринимателлэри кытары көрсөн, тас дойдулар киллэрбит хааччахтарын утары үлэ туһунан кэпсэппитэ. Предпринимателлэр мунньах кэмигэр тимир суолунан таһаҕаһы аҕалыыга богуон тиийбэтин, соҕурууттан кэлэр таһаҕас ыараан кэлэрин иһитиннэрбиттэрэ.
“Сыана үрдээһинин хонтуруолга тута сылдьабыт. Арассыыйа киин эрэгийиэннэриттэн кэлэр табаардар сыаналара, кирэдьиит бырыһыана үрдээбитинэн, о.д.а. ыарахаттар киирбиттэринэн предпринимателлэргэ көмө барыаҕа”, – диэн иһитиннэрдэ бүгүн СӨ бырабыыталыстыбатын вице-премьерэ Михаил Никифоров.
Аграфена КУЗЬМИНА