Маны аах Тыа хаһаайыстыбата

Михаил Никифоров Чурапчы Кытаанаҕар тутуллар оскуоланы хонтуруолга ылла

Бырабыыталыстыба бэрэссэдээтэлин солбуйааччы Михаил Никифоров  ааспыт күннэргэ илин эҥээр улуустарга үлэлээтэ.

Ол курдук, Мэҥэ Хаҥаласка уонна Чурапчыга сылдьан, бу улуустарга оттооһуну тэрийиини, кураанынан сибээстээн миэстэҕэ туох дьаһал ылыллыбытын, күннээҕи үлэни-хамнаһы, тутулла турар эбийиэктэргэ ыытыллар үлэни билистэ.

Чурапчы улууһун баһылыга Андрей Ноговицын иһитиннэрбитинэн, улуус 40 тыһ. туоннаны  оттуур былааннаах эрээри, үгүс нэһилиэктэр курааннаабыттар, ордук Бахсы, Алаҕар, Мугудай, Хадаар, Хайахсыт эмсэҕэлээбиттэр. Онон, эмиэ былырыыҥҥы курдук, ыраах учаастактарынан уонна атын улуустар сирдэригэр көһөн оттуур мобильнай биригээдэлэри тэрийэллэр. Нэһилиэк баһылыктара оттооһун хаамыытын тус хонтуруолга туталлар, атын улуустартан ходуһа сирин түүлэһэргэ кэпсэтиилэр өссө эрдэттэн ыытыллыбыттар, билигин төһө от атыылаһыллар туруктааҕын ааҕа-суоттуу сылдьаллар. Андрей Тимофеевич атыылаһыллар от сыанатын хонтуруолга тутар, мобильнай биригээдэлэргэ, кинилэр оттообут уонна атыылаһыллыбыт оту тиэйии-таһыы ороскуоттарын сороҕун толуйар наадатын туһунан эттэ.

Михаил Никифоров мобильнай биригээдэлэри үбүлээһин боппуруоһа үөрэтиллэ сылдьар диэтэ. Салгыы Хайахсыт нэһилиэгэр сылдьан, ходуһалары көрдө итиэннэ «Тыа сирин территорияларын кэлим сайыннарыы» бырагырааманан оҥоһуллар оскуола тутуутун хаамыытын билистэ. Хадаар уонна Хатылы нэһилиэктэригэр нэһилиэнньэни кытары көрүстэ. Кытаанахха сылдьан бэдэрээтчиттэртэн саҥа оскуола тутуута кыраапыктан тоҕо хаалан иһэрин ыйытта. Бу эбийиэги тус хонтуруолугар ылларын туһунан эттэ диэн Чурапчыттан улуус дьаһалтатын пресс-киинэ иһитиннэрэр.

Раиса Сибирякова, «Саха сирэ», edersaas.ru

0
0