Михаил Никифоров Бырабыыталыстыба үлэтин сыллааҕы отчуотун иһитиннэриэҕэ

Сарсын, олунньу 19 күнүгэр, Саха сирин Бырабыыталыстыбатын Бэрэссэдээтэлин солбуйааччы Михаил Никифоров өрөспүүбүлүкэ судаарыстыбыннай былааһын ситэриилээх уорганнарын сылын ахсын ыытыллар отчуотун оҥоруоҕа. Отчуот 9:45-11:00 чаастан «Саха», «Якутия 24» телеханааллар уонна «Тэтим» араадьыйанан кэлиэ.

Михаил Никифоров тыа хаһаайыстыбатын, эргиэн, туризм, бэтэринээрийэни сайыннарыы боппуруостарыгар сыһыаннаах ыйытыыларга тохтуоҕа, ааспыт сылга ыытыллыбыт үлэлэр тустарынан кэпсиэҕэ. Маны сэргэ, биэрии кыттыылаахтара 2022 сылга былааннаммыт үлэлэр тустарынан сырдатыахтара, дьон-сэргэ ыйытыытыгар хоруйдуохтара.

Отчуокка СӨ Тыа хаһаайыстыбатын миниистирэ Александр Атласов, Арктика сайдыытын уонна Хотугу норуоттар дьыалаларын миниистирэ Владимир Черноградскай, предпринимательство, эргиэн уонна туризм миниистирин эбээһинэһин толорооччу Максим Карбушев, бэтэринээрийэ департаменын салайааччыта Петр Петров кыттыыны ылыахтара.

Төлөпүөнүнэн ыйытыылары 8 (4112) 320111 нүөмэргэ эрийэн биэриэххэ сөп. Олунньу 12 күнүттэн +7 (4112) 51-00-21 төлөпүөнүнэн ыйытыы хааларыахха сөп. Ону таһынан https://yakutia.click/ порталга эмиэ суруйуоххутун сөп.

«Саха сирэ» хаһыат, edersaas.ru

Хаартыска sakha.gov.ru