Суолталаах Уопсастыба Үөрэх уонна наука

Михаил Мишустин Ытык Күөлгэ саҥа оскуоланы тутууга федеральнай үп көрүллэрин өйүүрүн биллэрдэ

Таатта улууһун Ытык Күөлүгэр 450 миэстэлээх уонна интэринээттээх саҥа оскуола тутуллуоҕа. Ил Дархан Айсен Николаев премьер-миниистир Михаил Мишустинтан саҥа эбийиэги тутуу үбүттэн сорох чааһын федеральнай бүддьүөт уйунарын туруоруста. 

«Өрөспүүбүлүкэҕэ тыа сиригэр инфраструктураны сайыннарыыга саҥа комплекснай былаан олоххо киирэр.  Спортивнай оонньуулар көмөлөрүнэн тыа сирэ лаппа тупсар, инфраструктурата саҥардыллар. 2025 сылга Таатта улууһун Ытык Күөлүгэр Манчаары оонньуулара буолар. Өрөспүүбүлүкэтээҕи былаанынан Ытык Күөлгэ интэринээттээх саҥа оскуола тутуллуохтаах», – диэн Айсен Николаев иһитиннэрдэ.

«Биллэн турар, оҕолор бары өттүнэн сөптөөх усулуобуйаҕа үөрэниэхтээхтэр. Онон бырайыак өйөнүллүөн наада, тустаах докумуоннары бэлэмнээн киллэриҥ», – диэн Михаил Мишустин өйүүрүн биллэрдэ.

Билигин Ытык Күөлгэ баар лиссиэй дьиэтэ 1974 сыллааҕы тутуу, саахалланар туруктаахтар испииһэктэригэр киллэриллибит. Онон оҕолор хас даҕаны сиринэн үөрэнэллэр. Тутуу бырайыага оҥоһуллан түмүктэнэн эрэр, быйыл алтынньыга экспертизаҕа бэриллиэхтээх.

0
0
Telegram @edersaas20