Михаил Мишустин социальнай үлэһиттэргэ төлөбүргэ 9 млрд тахса солкуобайы көрөр туһунан илии баттаата
Михаил Мишустин кимнээххэ төлөбүргэ үп көрөргө илии баттаата? Манна ааҕыҥ.
Онон коронавируһунан ыалдьыбыт уонна дьаҥҥа хаптарар кутталлаах дьону кытта симиэнэнэн үлэлиир социальнай тэрилтэлэр үлэһиттэригэр төлөбүргэ 9 млрд тахса солкуобай көрүллүөҕэ. Маннык дьаһалга Бырабыыталыстыба Бэрэссэдээтэлэ Михаил Мишустин илии баттаата.
Бу үп-харчы 2021 сыл бастакы аҥаарыгар анал төлөөһүннэри биэриигэ барыаҕа. Маны кырдьаҕастар дьиэлэригэр, инбэлииттэр олорор интэринээттэригэр уонна атын социальнай хайысхалаах тэрилтэлэргэ үлэлээччилэргэ ананыаҕа. Бу үлэһиттэри өйүүр туһунан Арассыыйа Бэрэсидьиэнэ Владимир Путин соруйбута. Хамсык балаһыанньатыттан сылтаан кинилэр үлэлиир симиэнэлэрэ 14 хонук устата ыытыллар уонна бу кэм устата үлэһиттэр тэрилтэ дьиэтин иһиттэн тахсыа суохтаахтар.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: тустаах саайта.