Михаил Мишустин Саха сирин IT-хампаанньаларын мэдиссиинэҕэ бырайыактарын үөрэтэргэ сорудахтаата
РФ Бырабыыталыстыбатын бэрэссэдээтэлэ Михаил Мишустиҥҥа Дьокуускайга IT-пааркаҕа сылдьар кэмигэр Саха сирин «Сайберия» уонна «Мондино Технолоджес» хампаанньаларын үлэлэрин билиһиннэрдилэр.
edersaas.ru
Премьер Саха сирин арыйыылара омуктан киириини солбуйуу бырагыраамаларын толорууга суолталаахтарын бэлиэтээтэ.
«Пандемия технологиялар сайдыыларын, ол иһигэр ускуустубаннай интеллект технологиялара сайдалларын, балачча улаханнык ыксатта. Мин эһиги ковиды уонна тыҥа ыарыыларын билэргитигэр, МРТ-га уонна мэйии ыарыыларыгар дьоһуннаах технологиялардааххытын билэбин. РФ Доруобуйа харыстабылыгар министиэристибэтиттэн, чуолаан Михаил Альбертович Мурашкоттан саҥа киллэриилэри көрөрүгэр көрдөһүөм, тоҕо диэтэххэ, итини түмүү уонна стандартизация олус суолталаах. Ону таһынан ыраах оройуоннар олохтоохторо ыарыыны түргэнник уонна хаачыстыбалаахтык быһаартарыахтаахтар. Билигин ыарыыны сөпкө быһаарыы олус элбэх боппуруоһу быһаарар», -– диэтэ Михаил Мишустин.
Санатан эттэххэ, «Сайберия» хампаанньа анаалыстарга мэдиссиинискэй хаартыскалары анал бырагырааманан хааччыйар. 2020 сыллаахха түөс килиэккэтин КТ-хаартыскаларын оҥоруу COVID-1 вирустаах пневмониятын быһаарарга ситиһиилээхтик туһаныллыбыта. Билигин РФ араас эрэгийиэнигэр мэдиссиинэ сэттэ тэрилтэтэ көдьүүстээхтик туһанар.
Премьергэ ону сэргэ «Мондино Технолоджес» хампаанньа оҥоһууларын, ол эбэтэр онлайн-диспансеризация бырайыактарын көрдөрдүлэр (онкология, кардиология, офтальмология). Кинилэр ортолоругар: «Онкопоиск» – скрининг уонна араагы эрдэ быһаарыы, «Глаукома саха» – глаукоманы буларга скрининговай сиэрбис, «Мондино Трекер Здоровья» – доруобуйаҕа ыраахтан мониторинг, «Дьахтар доруобуйата» – дьахтар доруобуйатыгар скрининговай сиэрбис, «Эн соҕотох буолбатаххын» – искэн ыарыылаахтарга психологическай көмө сиэрбиһэ, «Vivat Аптека» – онлайн-аптыакалар сиэрбистэрэ.
«Биһиги Арассыыйа бэрэсиэдьиэнин сорудаҕынан коронавирус пандемиятын бастакы долгунун кэнниттэн доруобуйаны дириҥник чинчийэр диспансеризациянан уонна доруобуйаны чөлүгэр түһэриинэн дьарыктанан барбыппытын билэҕит. Диспансеризация -– доруобуйаҕа күлүүс, биллэн турар, диспансеризацияны кэҥэтэн эрэ буолбакка, киһиэхэ муҥутаан чугаһатыахха наада. Табыгастаах, түргэн, мүнүүтэ иһинэн иһитиннрэрэр анкеталары толороҕут. Ол гынан баран, сүрүнэ, уочараты синхронизациялааһын. Михаил Альбертовичтан эһиги үлэҕитин барытын көрөрүгэр көрдөһүөм», -– диэтэ премьер.
Надежда ЕГОРОВА, «Саха сирэ», edersaas.ru (СӨ Ил Дарханын уонна бырабыыталыстыбатын пресс-сулууспатын матырыйаалларынан)