Михаил Мишустин: Саха сирэ IT-салааҕа инники күөҥҥэ сылдьар

Ааптар: 
Бөлөххө киир:

2025 сыл бүтүөр диэри Саха сирин Арктикатын улуустарын кииннэрин түргэн интэриниэт ситимигэр холбуур былаан баар. Ол аата интэриниэт 104 тыһыынча киһи олорор 86 нэһилиэнньэлээх пуунугар тиийиэхтээх. Саха сирин салалтата Арассыыйа премьер-миниистириттэн Михаил Мишустинтан бу бырайыак олоххо киирэрин өйөөн, федеральнай бүддьүөттэн үбүлээһин быһыытынан бырайыакка баранар үп аҥаарын уйунар туһунан көрдөстө. Саха сирин Арктикатын цифровизациялааһына 11,2 млрд солк сыаналаммыта.

Бүгүн IT-пааркаҕа Арассыыйа премьерыгар Арктикаҕа электроннай өҥөнү оҥорууну тупсарарга, интэриниэт өҥөтүн сыанатын сүүс төгүл кыччатарга анаммыт бырайыагы билиһиннэрдэилэр. “Цифровой тэҥэ суох буолуу” кыһалҕатын быһаарыы туһунан өрөспүүбүлүкэ Ил Дархана Айсен Николаев уонна инновация миниистирэ Анатолий Семенов дакылааттаатылар. Ол курдук, 7,4 тыһ. км ВОЛС ситимэ тардыллара былааннамыт. Түргэн интэриниэт Арктикаҕа тиийиитэ, телемэдиссиинэ өҥөтүн, үөрэх салаатын уо.д.а. сайыннарыаҕа.

“Цифровой уларыйыы Саха сиригэр кэлбит эрэ диир кыра – эһиги эрэгийиэҥҥит IT салаатыгар дойду үрдүнэн бастыҥнар истэригэр киирбитэ. Ситим ордук күүскэ сайдыбыт атын эрэгийиэннэрин кытта тэҥҥэ күрэстэһэҕит. Бу курдук сайдыылааххытын көрөргө астык. Онон мин эһиэхэ  соргуну баҕарабын уонна Максут Игоревичка (Максут Шадаев – Арассыыйа цифровой сайдыыга, сибээскэ уонна маассабай коммуникацияҕа миниистирэ) эһиги этиилэргитин, ирдэбилгитин болҕомтолоохтук истэригэр ыҥырыаҕым. Эһиги уопуккутун үөрэтэри таһынан, эһиэхэ ханнык сакааастары түһэрэр туһунан толкуйдуохпут. Махтанабын”, — диэтэ Михаил Мишустин.

Быйыл бу бырайыак чэрчитинэн бырайыактыыр-чинчийэр үлэлэр саҕаланыахтара, оттон быһаччы олоххо киллэрии эһиилгиттэн саҕаланыаҕа. ВОЛС ситимэ Арктика улуустарын киин бөһүөлэктэрин түргэн интэриниэтинэн, суотабай сибээһинэн хааччыйыаҕа, улуустар икки ардыларыгар сибээс инфраструктуратын кэҥэтиэҕэ.

Саха сиригэр билигин 13 тыһыынчаттан тахса килэмиэтир ВОЛС тардыллан, өрөспүүбүлүкэ 373 нэһилиэнньэлээх пуунугар холбоммуттара. 2020 сылга Арктика улуустарыттан бастакылара Өлөөн холбоммута, бу сыл бүтүүтэ Анаабыр улууһа холбонуоҕа. Бу бырайыактар муниципальнай-чааһынай бииргэ үлэлээһин чэрчитинэн олоххо киирбиттэрэ.

Мария Васильева хаартыската.

+1
0
+1
0
+1
0
+1
0
+1
0
+1
0
+1
0