Михаил Мишустин: «Федеральнай үбү тустаах дьыалаҕа сөптөөхтүк туһанарга кыһаллыҥ»

Бүгүн, атырдьах ыйын 15 күнүгэр, РФ Бырабыыталыстыбатын бэрэссэдээтэлэ Михаил Мишустин Дьокуускайга кэлэн,  халаан уутун уонна ойуур баһаардарын содулларын туоратыыга аналлаах мунньаҕы ыытта. 

Михаил Мишустин бүгүҥҥү мунньаҕы түмүктүүрүгэр «Федеральнай үптэн тустаах сыалга сөптөөх үп көрүллэр, ону бары эрэгийиэннэр сөптөөхтүк дьаһанан туһанаргытыгар сүбэлиибин. Ойуур баһаарын уонна халаан уутун туоратыыны кытаанах хонтуруолга тутан олоруҥ. Эрэгийиэннэр салайааччыларын  этиилэрэ  боротокуолга киирдэ. Кэккэ сорудахтар бэриллиэхтэрэ. Ойуур баһаарын туоратыыга, бохсууга РФ Бэрэсидьиэнэ Владимир Путин сорудаҕын толорорго кыһаллыҥ, хонтуруолга тутуҥ. Рослесхоз ойуур баһаардара турар сезона түмүктэннэҕинэ, быйылгы сылы анаалыстыыр түмүгү оҥороргутугар сорудахтыыбын. Ону тэҥэ, РФ айылҕа ресурсаларыгар, экологияҕа уонна үп министиэристибэлэрэ бүдьүөт бырайыагын оҥорууга сыллааҕы үбүлээһини болҕомтоҕо ыларгытыгар этэбин», — диэн эттэ.

Сүрүн дакылааттары РФ Гражданскай оборуонаҕа, ыксаллаах быһыыны-майгыны туоратыыга  миниистирэ Александр Куренков, РФ Айылҕа ресурсаларыгар уонна экологияҕа миниистирэ  Александр Козлов, СӨ Ил Дархана Айсен Николаев уонна Уһук Илин уокуругун эрэгийиэннэрин күбүрүнээтэрдэрэ оҥордулар.

Мунньахха  Уһук Илиҥҥи федеральнай уокурукка боломуочуйалааҕа — вице-премьер Юрий Трутнев, РФ  Гражданскай оборуонаҕа, ыксаллаах быһыыны-майгыны  туоратыыга  миниистирэ Александр Куренков, РФ тутууга уонна хомунаалынай  хаһаайыстыбаҕа миниистирэ Ирек Файзуллин, РФ Уһук Илини уонна Арктиканы сайыннарыыга миниистирэ Алексей Чекунков кытыннылар.