Михаил Мишустин эминэн хааччыйыыга “суһал линияны” тэрийэргэ сорудахтаата
Бу нэдиэлэ бүтүүтэ Арассыыйаҕа эминэн уонна мэдиссиинэ тэриллэринэн хааччыллыыга “суһал линия” үлэтин саҕалыахтаах.
Маны тэрийэргэ Бырабыыталыстыба Бэрэссэдээтэлэ Михаил Мишустин сорудахтаата. Сорудах коронавирус саҥа инфекциятын тэнийиитин бохсууга сүрүннүүр сэбиэт мунньаҕын түмүктэринэн бэрилиннэ.
“Суһал линия” эрэгийиэннэргэ, аптекаларга уонна дистрибьютордарга үлэлиэҕэ. Маны Бырамыысыланнай эргиэн министиэристибэтэ сүрүннүөҕэ. Ол түмүгэр эминэн уонна мэдиссиинэ тэриллэринэн хааччыйыы боппуруостара суһаллык быһаарыллар буолуохтара.
Доруобуйа харыстабылын министиэристибэтигэр Бырабыыталыстыба Бэрэссэдээтэлэ тустаах сорудаҕы хонтуруоллуурга соруйда. Бу линияны мэдиссиинэ үлэһиттэрэ эминэн уонна тэриллэринэн хааччыллыыга үөскээбит кыһалҕалар тустарынан биллэрэллэригэр анаан оҥордулар.
Михаил Мишустин Сүрүннүүр сэбиэт мунньаҕар эмп-том тиийбэтин туһунан киирэр иһитиннэриилэргэ түргэнник дьаһанар наадатын бэлиэтээтэ. Кини этэринэн, бу барыта балыыһаларга уонна аптекаларга толору кээмэйинэн баар буолуохтаах.
Роспотребнадзорга Бырабыыталыстыба баһылыга коронавирус саҥа инфекциятыгар нэһилиэнньэҕэ тест оҥорорго санитарнай ирдэбиллэри чопчулууругар соруйда. Маны тэҥэ биэдэмистибэ нэдиэлэ аайы Бырабыыталыстыбаҕа эрэгийиэннэргэ хамсык туругун туһунан түмэн дакылаат ыытыахтаах.
РФ Бырабыыталыстыбатын саайтыттан
Бэлэмнээтэ Женни Стрюкова.