Арассыыйа Бырабыыталыстыбатын бэрэссэдээтэлэ Михаил Мишустин «РФ Арктикатааҕы зонатын социальнай-экэнэмиичэскэй сайдыытын» судаарыстыбаннай бырагырааматыгар «Арктика оҕолоро» бырагырааманы киллэрэргэ соруйда. Бу туһунан бүгүн Ил Дархан Айсен Николаев инстаграмыгар иһитиннэрдэ.
«Бу бырагыраама олоххо киирэригэр мин кэллиэгэлэрим Ил Түмэн бастайааннай кэмитиэтин бэрэссэдээтэлэ Феодосия Габышева, оттон федеральнай таһымҥа РФ федеральнай мунньаҕын Федерациятын сэбиэтин бэрэссэдээтэлэ Валентина Матвиенко, Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев, Уһук Илин уонна Арктика сайдыытын миниистирэ Алексей Чекунков уо.д.а. үлэлээбиттэрэ. «Арктика оҕолоро» бырагыраама бырайыагын мин 2019 сыллаахха IX норуоттар икки ардыларынааҕы «Арктика: бүгүҥҥүтэ уонна инникитэ» форумҥа билиһиннэрбитим. Оччолорго Саха сирин көҕүлээһинин атын эрэгийиэннэр өйөөбүттэрэ», — диэн Ил Дархан иһитиннэрэр.
Бу бырагыраама федеральнай таһымнаннаҕына биһиги оҕолорбутун өйөөһүн систиэмэлэниэҕэ, доруобуйаларын бөҕөргүтүнэллэригэр усулуобуйа баар буолуоҕа. Итиэннэ талааннаах оҕолору өйүүр систиэмэ сайдыҕа уонна көһө сылдьар оскуолалар, уһуйааннар педагогтарыгар эбии өйөбүл баар буолуоҕа.
edersaas.ru