Арассыыйа премьер-миниистирэ Михаил Мишустин экэниэмикэ тутаах салааларыгар тас дойдуттан атыылаһыллар цифровой бородуукталары солбуйууну быһаарар аналлаах индустриальнай кииннэри тэрийэргэ сорудах биэрдэ. «Цифровой сайдыыга министиэристибэтэ атын биэдэмистибилэри кытта үлэҕэ ылыллыан сөптөөх этиилэри бэлэмнииригэр көрдөһөбүн», — диэн Михаил Мишустин «Арассыыйа бырамыысылыннаһын цифровой индустрията» диэн кэмпириэнсийэҕэ бэс ыйын 3 күнүгэр эппит тылыгар ыҥырыы оҥордо.
Михаил Мишустин бу эйгэҕэ салайар оруоллаах улахан хампаанньалар бэрэстэбиитэллэрин көхтөөхтүк кытталларыгар ыйда. Цифровой индустрия инники кирбиитигэр сылдьар дойдубут флагманнара бу үлэҕэ хайаан даҕаны кыттыахтаахтарын бэлиэтээн эттэ. “Бу үлэҕэ аккаастанар, куотунар сыыһа, туруоруллубут болдьохтору тутуһан үлэлиэх тустаахтар” — диэтэ премьер-миниистир.
Ону сэргэ РФ Бырабыыталыстыбатын бэрэссэдээтэлэ цифровой саҥа бородуукталары үлэҕэ киллэриигэ сакаасчыттар уонна оҥорон таһаарааччылар күүстэрин түмэргэ ыҥырда. Цифровой сайдыы миниистирэ Максут Шадаевка от ыйын ортотугар диэри бииргэ үлэлээһин боппуруостарын, ону тэҥэ аналлаах индустриальнай кииннэр хайдах састааптаах буолуохтаахтарын быһаарарга сорудахтаата.
Михаил Мишустин омук сиригэр таҥыллыбыт цифровой бырагыраамалары Арассыыйаҕа оҥоһуллубут бородуукталарга солбуйуу үлэтин Бырабыыталыстыба хамыыһыйата кэтээн ыытарыгар сорудахтаата. «Арассыыйа бырамыысылыннаһын цифровой индустрията» VII-с кэмпириэнсийэ Нижний Новгород куоракка цифровой индустрия салайар тэрилтэлэрин түмэн ааспыт нэдиэлэҕэ ыытылынна.