Ил Дархан Айсен Николаев Арассыыйа премьер-миниистирэ Михаил Мишустиҥҥа Саха сиригэр таҥыллыбыт «Extra Cinema» киинэ быракаатын саҥа ситимин кытта билиһиннэрдэ. Бу киинэни киинэ тыйаатырдарыгар тарҕатарга анаммыт систиэмэ бу ый бүтүүтэ Саха сирин үс нэһилиэнньэлээх пуунуттан саҕалаан, былаан быһыытынан Арассыыйа үрдүнэн тарҕаныахтаах.
“Бу систиэмэ сүрүн уратыта – Саха сиригэр айыллан оҥоһуллубут кинопроекторга уонна серверга сытар. Бу кинопроектор бэйэтэ киинэ авторскай быраабын ааҕар, киинэ оҥорооччуларын кытта көнөтүнэн алтыһарга көмөлөһөр. Онон быракаат сыаната лаппа чэпчиир, онон аҕыйах дьонноох нэһилиэктэргэ киинэни көрдөрөр барыстаах буолуоҕа”, — диэн Ил Дархан бырайыак уратыларын кэпсээтэ.
“Билигин дойдубут киинэ тыйаатырдара бары кэриэтэ АХШ кинопроектордарынан үлэлииллэр. Биһиги кинопроектордарбыт быдан чэпчэки сыаналаахтар. Тоҕо бу бырайыак Саха сиригэр үөскээбитэй? Тоҕо диэтэххэ, биһиги эрэгийиэммитигэр киинэни оҥоруу улаханнык сайдан турар. Ол иһин, биһиги дьоммут авторскай бырааптарын көмүскээн туран Арассыыйа уопсай быракаатыгар үлэлэрин таһаарыахпытын баҕарабыт. Бу ситим көмөтүнэн биһиги 3 тыһыынчаттан кыра нэһилиэнньэлээх пууннарга киинэ саалаларын арыйыахпытын сөп, эрдэ ити курдук кыра сирдэргэ киинэ көрдөрүүтэ барыс киллэрбэт буолан сатаммат этэ”, – диэн быһаарда Айсен Николаев.
Эрдэ бу бырайыагы Саха сирин бэрэстэбиитэллэрэ “Арассыыйа креативнай нэдиэлэтигэр” илдьэн улахан интиэриэһи ылбыттара.