Михаил Кириллин: «Арктика түөлбэтин сир баайдаах сирин баһылааһын – Саха сирин стратегията»
Саха Өрөспүүбүлүкэтин бырамыысыланнаска уонна геологияҕа миниистирин бастакы солбуйааччы Михаил Кириллин Арктика сир баайын саппааһа эрэгийиэҥҥэ уонна дойду бырамыысыланнаһыгар инники кыахтарын хааччыйыаҕа диэн эрэнэр.
“Арктикаҕа бырамыысыланнас кыаҕын сайыннарыыга чопчу көҕүлээһиннэри өйөөһүн – Хоту дойдуга нэһилиэнньэ туруктаах олохтоох уонна үлэлээх буолуутун хааччыйыыга сүрүн соруктартан биирдэстэрэ. Углеводородтары, сэдэх тимирдэри, алмаастары, кыһыл көмүһү уонна хорҕолдьуну Саха сирин тыйыс усулуобуйатыгар хостооһун тэхиньиичэскэй өттүнэн уустуктардаах, ол эрээри баайдаах сирдэри тэтимнээхтик баһылааһын Арктикаҕа биһиги инвестордары кытта үлэлииргэ баҕалаахпытын көрдөрөр”, — диэтэ Михаил Кириллин.
Миниистири солбуйааччы этэринэн, Арктиканы сайыннарыыга стратегическай соруктары толорууга төрүт уонна аҕыйах ахсааннаах норуоттары кытта атах тэпсэн олорон кэпсэтии ирдэнэр. Сыала – Хоту дойду нэһилиэнньэтин олоҕун-дьаһаҕын тупсарыы, сытыы кыһалҕалары дьүүллэһии.
Кини бырамыысыланньыктар уонна урбаанньыттар РФ Арктикатааҕы түөлбэтигэр тулалыыр эйгэҕэ бэйэлэрин үлэлэрэ дьайыытыгар экологическай сыанабылы оҥоруохтаахтар диэн эттэ.
“Арктика сирин-уотун сайыннарыы тутаах соруктартан биирдэстэринэн экология боппуруостара буолаллар. Биһиги эспиэрдэр уонна уопсастыбаннас долгуйуутун өйдүүбүт. Ол иһин, бырамыысыланнай хампаанньалар ыыппыт чинчийиилэрин туһунан иһитиннэриини биэриигэ наука кииннэрин кытта ыкса үлэлиэхтээхтэр. Ити Арктика уйаҥ айылҕатыгар дьайыыны аччатыаҕа уонна Арктикаҕа кэтээн көрүүнү күүһүрдүөҕэ”, – диэн бэлиэтээтэ Михаил Кириллин. Онон маны бэлэмнииргэ чинчийиилэри ыытар туһугар исписэлиистэри кытыннарыахха наада. Өрүттэр сөбүлэһиилэринэн докумуоҥҥа хоромньуну толуйуу киириэхтээх.
Санатан эттэххэ, РФ премьер-миниистирэ Михаил Мишустин сир баайын хостуур хампаанньалар уонна Арассыыйа аҕыйах ахсааннаах норуоттарын икки ардыларыгар кинилэр төрүт уутуйан олохсуйбут сирдэригэр хоромньуну толуйалларын туһунан сөбүлэһии түһэрсии бэрээдэгин бигэргэппитэ.
Сахаговтан Женни Стрюкова бэлэмнээтэ
Хаартыска: тустаах саайтан