Михаил Иванов “Тахти Кубогар” кыһыл көмүс мэтээл иһин киирсиэҕэ
Олунньу 7-8 күннэригэр Тегераҥҥа (Иран) буола турар көҥүл тустууга “Тахти Кубога” норуоттар икки ардыларынааҕы турнирга саха тустууга оскуолатын иитиллээччитэ Михаил Иванов 57 киилэҕэ диэри ыйааһыҥҥа финалга тахсары ситистэ. Кыайыылааҕы быһаарар түмүк хапсыһыыга кинини утары Турция чөмпүйүөнэ Ахмет Думан тахсыаҕа.
Москва хамаандатыттан кыттар биир дойдулаахпыт бастакы хапсыһыытыгар ыччаттар ортолоругар аан дойдуга бастыыр иһин күрэхтэһии (2013) кыайыылааҕын, устудьуоннар ортолоругар аан дойду чөмпүйүөнүн (2016), Исламиада боруонса призерун (2017) иранец Юнес Сармастины 9:5 ахсаанынан баһыйа тутта. Салгыы Кыргызстан бөҕөһүн Алмаз Сманбековы — 4:2, онтон финал аҥарыгар Венгрия аатыттан тустар дагестанец Гамзатгаджи Халидовы 9:4 ахсаанынан хотуталаан финалга тахсары ситистэ.
Кыайыылааҕы быһаарар хапсыһыыга Бүлүүттэн төрүттээх 29 саастаах бөҕөспүт бэйэтиттэн уон сылынан балыс Турция чөмпүйүөнүн Ахмет Думаны кытта тустуоҕа.
Бу улахан түһүлгэҕэ эмиэ 57 киилэлээхтэргэ тустубут Егор Потаповпыт бастакы эргииргэ Алирез Сарлакка (Иран) 2:6 ахсаанынан баһыйтарда.
“Тахти Кубогын” кыайыылаахтарын быһаарар түмүк киирсиилэр Дьокуускай бириэмэтинэн киэһэ 19:30 чаастан саҕаланыахтара.
Роман ПОПОВ, «Саха сирэ» хаһыат, edersaas.ru
Хаартыска: интэриниэттэн ылылынна