Уопсастыба

Михаил Гуляев: “Успуордунан хас биирдиибит дьарыктаныахтаах”

Ил Түмэн ыччат дьыалаларыгар, физкултуураҕа, успуорка сис кэмитиэтин салайааччыта Михаил Гуляев иһитиннэрбитинэн, Саха сиригэр успуордунан дьарыктаныы өссө тэтимириэҕэ.

Бу күннэргэ Ил Дархан Айсен Николаев физкултуура, успуорт сайдыытын сэбиэтин мунньаҕын ыытта. Мунньахха оҕо успуордун сайдыытын туһунан кэпсэтии барда. Былырыын күһүн РФ бэрэсидьиэнэ Владимир Путин сорудаҕынан Арассыыйаҕа успуорду сайыннарыыга концепция оҥоһуллубута. Ол концепция чэрчитинэн биһиэхэ эмиэ туспа бырагыраама оҥоһуллан бигэргэниэҕэ. Бу бырагырааманан 2030 сылга диэри тириэньэрдэр, учууталлар ахсааннара үс бырыһыан элбиэхтээх. Оскуолаҕа физкултуураны биэрии чааһа элбиэҕэ. Ону таһынан бырагыраамаҕа оҕо сайыҥҥы дьарыгар сүрүн болҕомто ууруллубута үчүгэй. Билигин өрөспүүбүлүкэбитигэр оҕо успуордугар анаммыт 68 оскуола үлэлиир. Ол иһигэр успуордунан дьарыктаныыга эбии үөрэхтээһин быһыытынан киирбит анал оскуолалар, успуорт судаарыстыбаннай оскуолалара, олимпиада резервэтин оскуолата, о.д.а. эбийиэктэрдээхпит, – диэн иһитиннэрэр Михаил Дмитриевич.

Нэһилиэнньэ успуордунан дьарыктаныытыгар сыһыаран сис кэмитиэт бэрэссэдээтэлэ успуорт эбийиэктэригэр болҕомто күүһүрбүтүн бэлиэтээтэ.

Концепциянан 2030 сылга диэри успуордунан дьарыктанар киһи ахсаана уопсай нэһилиэнньэ ахсааныттан 75 % ылыахтаах. Ол эбэтэр хас иккис киһи успуордунан дьарыктаныахтаах. Биһиги өрөспүүбүлүкэбитигэр 2018 сыллаахха успуордунан дьарыктаныы 38,9 бырыһыан буоллаҕына, билигин 47 бырыһыан буолбут. Ити үчүгэй көрдөрүү. Салгыы дьон-сэргэ успуордунан дьарыктанарын көҕүлүүргэ үгэскэ кубулуйбут маассабай күрэхтэһиилэр, тэрээһиннэр өссө күүскэ ыытыллыахтарын наада. Ол иһигэр хайыһарга, сүүрүүгэ бары күргүөмүнэн тахсыыбыт, хаамыы күннэрин ыытыыбыт барыта киириэхтээх. Ил Дархан успуорт эбийиэктэригэр, инвентардарыгар болҕомтотун уурбута кэрэхсэбиллээх, – диэн иһитиннэрэр кини.

Санатан эттэххэ, бу күннэргэ Ил Дархан Айсен Николаев успуорт сайдыытын өрөспүүбүлүкэтээҕи сэбиэтин мунньаҕын ыыппыта. Онно кини дьон-сэргэ успуордунан дьарыктанарыгар бары усулуобуйа баар буолуохтааҕын этэн туран, элбэх кыбартыыралаах дьиэлэр бырайыактарыгар хайаатар да спорт саалалара баар буолуохтаахтарын бэлиэтээбитэ. Ону таһынан оскуолаларга физкултуура уруоктарын элбэтэргэ эппитэ. 2019 сыллаахха Ил Дархан сорудаҕынан талааннаах оҕолору өйүүргэ эрэгийиэннээҕи киин тэриллибитэ. Успуорт эйгэтигэр Спортивнай резервэни бэлэмниир өрөспүүбүлүкэтээҕи киин сүрүн былаһаакка буолбута.

Аграфена КУЗЬМИНА.

0
0
Telegram @edersaas20