Дойдуга буола турар быһыы-майгы туһунан Ил Түмэн ыччакка, физкультураҕа, спорка бастайааннай кэмитиэтин бэрэссэдээтэлэ Михаил Гуляев санаатын үллэстэр:
—Луганскайга, Донецкайга аҕыс сыл устата эйэлээх нэһилиэнньэни бандеровецтар сэриилээн, баттаан олорбуттара уонна уопсайынан, Украинаҕа фашизм идеологиятын ыччаты, оҕону иитиигэ күүскэ ыыппыттар эбит. Биологическай сэрии сэбин оҥорор лабораториялар тэриллэн үлэлии сылдьалларын туһунан кэпсииллэр. Маннык кутталлаах сэп-сэбиргэл оҥоһуллубута буоллар, аан дойду үрдүнэн алдьархай буолуо этэ. Биһиги билэбит, вирус хайдах курдук алдьатыылааҕын – ол курдук “ковид” вируһа аан дойдуну бүтүннүү сутуйда. Маннык вирустар оҥоһуллар буоллахтарына, аан дойдуга бүтүннүүтүгэр да кутталы үөскэтэллэр.
Иитии суолтатыгар эттэххэ, урукку өттүгэр патриотическай иитии олус күүстээх этэ. Бу маннык балаһыаннаьаҕа патриотическай иитиини өссө күүскэ ыытыахха наада дии саныыбын. Биһиги Ил Түмэҥҥэ былырыын патриотическай иитиигэ анаан сокуон бастакы барылын ылан турабыт. Бу ый бүтүүтэ патриотическай иитиигэ сокуону бүтэһиктээктик ылыныахпыт. Онон өрөспүүбүлүкэҕэ уонна Арассыыйаҕа патриотическай иитиигэ улахан болҕомтону ууруллуон наада.
Ыччат, оҕолор маны таба өйдүөхтэрин наада. Биһиги бэйэбит дойдубутун көмүскээбэтэхпитинэ, түмсүбэтэхпитинэ, төрөөбүт-улааппыт дойдубутун үчүгэйдик санаабат, таптаабат буоллахпытына, атын ким да таптыа, сыаналыа суоҕа. Ол иһин оҕолорбутугар, ыччаппытыгар бу хайысханан күүстээх үлэни оскуола эҥээринэн ыытыахтаахпыт.
Билигин буола турар балаһыанньаҕа улахан түмсүү наада. Сааҥсыйалары биллэрэн, Арассыыйа үрдүнэн элбэх үлэ миэстэтэ тэриллэн эрэр. Тас дойдулартан киирэр табаардары солбуйар аһы-үөлү, табаардары оҥоруу үлэлэрэ бара тураллар. Биһиги өрөспүүбүлүкэбитигэр Ил Дархан Айсен Николаев хас да төгүл мунньаҕы ыытта, бырабыыталыстыба уонна Ил Түмэн түмсэн, сүбэлэстибит. Сибилигин чопчу дьаһаллар ылыллан, үлэ-хамнас күүскэ барыан наада. Үлэ миэстэтэ таҕыстаҕына, дьон-сэргэ билбэккэ, олорон хаалыа суохтаах уонна үчүгэйдик үлэлээн-хамсаан биэриэхтээх. Оччоҕо, дьэ, олохпутун-дьаһахпытын бэйэбит оҥорон, тупсарыа этибит диэн санаалаахпын.
Ангелина Васильева, “Саха сирэ” хаһыат, edersaas.ru
Хаартыска: iltymen.ru.