Маны аах Сүрүн Успуорт

Михаил ГОГОЛЕВ — Олоҥхо ыһыаҕын «ЭР БЭРДЭ» күрэҕин кыайыылааҕа

Бэҕэһээҥҥиттэн өҥ буордаах Өлүөхүмэ сиригэр Олоҥхо ыһыаҕа саҕаланна. Бастакы күн киэһэтигэр   “Эр Бэрдэ” күрэх ыытылынна.  Уопсайа 11 боотур бастыыр иһин илин-кэлин түһүстэ.

 

«Спорт Якутии» хаһыакка Баһылай Посельскай суруйарынан: «Мииринэй икки миэтэрэлээх бухатыыра, армлифтинг маастара Роман Рива уонна Уус Алдан күүстээҕэ, мас тардыһыы маастара Михаил Гоголев харааныттан иэмэх талахтыы эристилэр. Көрүҥтэн көрүҥ аайы хардарыта бастакы-иккис миэстэлэри ылаттаан истилэр. “Сыарҕа соһуутугар” уонна “Бэрэмэдэйдээх” сүүрүүгэ Михаил Гоголев ылаттаата, Роман Риве “Өлүөхүмэ таастарын” үөһэ көтөҕөн таһааран уурталааһыҥҥа уонна “Балаҕан нөҥүө” тааһы быраҕыыга бастаталаата. Бүтэһик бэһис көрүҥҥэ алталыы очколаах тэҥҥэ тиийэн кэлбиттэригэр, кыайыылааҕы 117 киилэ ыйааһыннаах тааһы ыраах илдьии быһаарда. Сэрэбиэй быһыытынан маҥнайгынан Роман Риве онус киһинэн барда уонна 100 м ыраахха илдьэн тааһын ыһыгынна. Инники барбыттартан таһыччы үчүгэй көрдөрүүлэннэ. Ыһыах дьонун, ыалдьааччылар болҕомтолоро бүтүннүүтэ бүтэһигинэн барбыт Михаил Гоголевка туһаайылынна. Сирэйиттэн-хараҕыттан көрдөххө хайаан даҕаны бастыырга соруммута биллэр. Ыарахан тыыннаах сымара тааһын көтөҕөн мадьалытан, аара үстэ тохтоон сынньанан, тыын ыла-ыла эккирэттэ, итиэннэ, туох-баар күүһүн, тулуурун киллэрэн 101 м ыраахха илдьэн тааһын түһэрдэ! Ити курдук, Михаил Гоголев аан маҥнайгытын Олоҥхо ыһыахтарыгар сыллата ыытыллар “Эр Бэрдэ” күрэхтэһиитин кыайыылааҕынан буолары ситистэ, дьон уруйун-айхалын ылыан ылла».

Баһылай Посельскай, @sportyakutia.ru 

 

0
0