Михаил Черосов Арктика сайдыытын стратегиятын тула санаатын үллэһиннэ

Ааспыт нэдиэлэҕэ Ил Дархан Айсен Николаев Саха сиригэр 2035 сылга диэри хотугу зона социальнай-экономическэй сайдыытын туһунан ыйаахха илии баттаабыта.

Бу туһунан биологическай наука доктора, СӨ Экологияҕа министиэристибэтин уопсастыбаннай сэбиэтин чилиэнэ Михаил Черосов санаатын үллэһиннэ:

— Стратегияҕа айылҕа баайын уонна экологическай бырайыактары сөптөөхтүк туһаннахха сүрүн сыал быһаарыллыа диэн суруллубут. Айылҕа харыстабылын боппуруоһа — эрэгийиэн сайдыытын биэс хайысхатыттан биирдэстэрэ.

Арктика олохтоохторугар анаан сонун толкуйдардаах, экологическай ирдэбиллэргэ толору эппиэттиир бөһүөлэктэр  баар буолаллара үөрдэр.

Сир баайын туһаныы уонна этнологическай эспэртиисэ туһунан докумуоҥҥа киирбитэ дьоһуннаах. Кытаанах коммунальнай тобох, сири-уоту чөлүгэр түһэрии, хотугу норуоттар төрүт дьарыктарын сайыннарыы тула үлэлэр ыытыллыахтара. Атын судаарыстыбаннай бырагыраамалар курдук үбэ толкуйдаммыт ыйаах буолар. Бу ыйаах Арктика нэһилиэнньэтин олоҕо саҥа таһымҥа тахсыыта буолуоҕа.

sakha.gov.ru саайтан.

Хаартыска — СИА.