СӨ Тас сибээскэ уонна норуоттар дьыалаларыгар миниистир Гаврил Кириллин бэҕэһээ быһа сибээскэ тахсан нэһилиэнньэ ыйытыыларыгар хоруйдаата.
edersaas.ru
Дьону-сэргэни сүрүннээн миграннар ахсааннара, өрөспүүбүлүкэ Аан дойдуну кытта сибээһэ, тас дойдуттан көмө долгутта.
Миграннар ахсааннара кыччаабыт
Гаврил Кириллин этэринэн, кэлии дьон ахсаана үс төгүл кыччаабыт. «Өскөтүн былырыын 21 тыһыынча мигрант учуокка турбут эбит буоллаҕына, быйыл 7 тыһыынча. Бу коронавирус пандемиятын кытта быһаччы сибээстээх. Ол өрөспүүбүлүкэ экэниэмикэтигэр охсуулаах – үлэһит илии тиийбэтэ баар суол», — диэн миниистир эттэ.
Саха сирэ тас дойдуну кытта ситимин быспат
Гаврил Кириллин: «Бииргэ үлэлэһии сөбүлэҥнэрэ хас да дойдуну кытта түһэрсиллэн тураллар. Кытай, Корея, Япония, Америка холбоһуктаах ыстааттара, итиэннэ хас да евросойуус дойдутун кытта үлэлиибит. Холобур, быйыл Канада бырабыыталыстыбата Саха сирин кытта сөбүлэһиинэн, «Элк Айлэнд» национальнай пааркаттан бизоннары ыытта”.
Миниистир Саха өрөспүүбүлүкэтэ хас да норуоттар икки ардыларынааҕы тэрилтэлэри кытта үлэлэһэр диэн бэлиэтээтэ. “Саха сирэ Хотугу Пуорум тэриллиэҕиттэн бастайааннай чилиэн буолар. Эһиил пуорум 30 сылын бэлиэтиэхпит”, — диэн эбэн эттэ.
«Маны таһынан, Саха сирэ Хотугулуу-Илиҥҥи Азия дойдуларын эрэгийиэннээҕи дьаһалталарын ассоциациятын (АРАССВА) салайан үлэлэтэр. Манна Арассыыйа, Японии, Кытай, Соҕуруу Корея, Кытай норуодунай өрөспүүбүлүкэтэ уонна Монголия киирсэр. Бу ассоциация эһиилги генеральнай ассамблеята Дьокуускайга буолуоҕа.
Итиэннэ ЮНЕСКО курдук бөдөҥ тэрилтэни кытта ыкса үлэлэһэбит. ЮНЕСКО Саха өрөспүүбүлүкэтин кытта отучча бырайыагы олоххо киллэрбитэ”, — диэн Гаврил Кириллин түмүктээтэ.
Ситим күүһүрэр
Миниистир Гаврил Кириллин бырааттыы куораттар суолталара пандемия кэмигэр өссө улаатта диир. Ол курдук, «Кытайтан 200 тыһыынчаттан тахса мэдиссиинэ мааската кэлэн, коронавирус дьаҥыгар улахан көмөнү оҥордо. Ити курдук, хас да улуус атын дойду куораттарын кытта доҕордуу сыһыаны олохтоон, бэйэ-бэйэҕэ көмөлөсүһэр үтүө үгэс олохтоммута кэрэхсэбиллээх», — диэн эттэ.
Санатар буоллахха, бырааттыы куораттар аан дойдутааҕы федерациялара муус устар 28 күнүгэр 1957 с. Парижка тэриллибитэ. Бырааттыы куораттар историяҕа, култуураҕа, экэниэмикэҕэ үөрэхтээһиҥҥэ, мэдиссиинэҕэ, онтон да атын олох бары эйгэтигэр туһуламмыт боппуруостарга бииргэ үлэлээһини ыыталлар.
Ирина Ханды, “Саха сирэ” хаһыат, edersaas.ru