Сунтаардааҕы киин балыыһа Саҥа дьыл иннинэ “Хартыынаны тилиннэр” диэн онлайн-күрэһи үлэһиттэригэр ыытта. Манна нэһилиэктэр балыыһалара, амбулаториялара, биэлсэр-акушер пууннара көхтөөхтүк кытыннылар.
Сүрүннээн сэбиэскэй киинэлэр (сороҕор Голливуд да гиэннэрин) уонна нуучча, саха худуоһунньуктарын хартыыналарын дьоруойдарын уобарастарын үтүктэн, мал-сал, таҥас булан, анаан хаартыскаҕа түһэн ыыттылар, оҕолорун эмиэ кытыннардылар.
Миэдиктэр, төһө да уодаһыннаах ыарыыны утары охсуһа сырытталлар, көхтөөхтөрүн, ураты толкуйдаахтарын, көрдөөхтөрүн көрдөрдүлэр. Манна туттуу-хаптыы, кырааскаланыы, уобараска киирии да оруоллаах эбит. Олус интэриэһинэй, сэргэхситэр, туһугар умсугутуулаах күрэс буолла.
Күрэскэ Сунтаардааҕы поликлиника үлэһиттэрэ бастаатылар. Быраастар, сиэстэрэлэр, санитаркалар туора турбатылар.
Ону тэҥэ, нэһилиэктэр балыыһаларын, амбулаторияларын, биэлсэр-акушер пууннарын үлэһиттэрин арыйбыт уобарастарын бу сигэнэн киирэн көрүҥ.
Ангелина Васильева, «Саха сирэ» хаһыат, edersaas.ru
Хаартыска: батсааптан.