Ахсынньы 15 күнүгэр Дьокуускайдааҕы 2-с №-дээх балыыһа “кыһыл зонаҕа” үлэлиир 10 үлэһитэ коронавируһу утары «Спутник V» («Гам-ковид-вак») быһыыны ыллылар.
— Бу кэнниттэн 21 хонон баран, бүгүн ылбыт дьон иккис быһыыларын ылаллар. Бу вакцинаны сөпкө көрөн-истэн тиэйдэххэ, харайдахха эрэ көдьүүстээх буолар. -18-тан үрдүгэ суох кыраадыстаах, тымныы, анал халадыынньыктарга эрэ хараллыахтаах. Биһиги балыыһабытыгар оннук усулуобуйа барыта баар, — диэн балыыһа кылаабынай бырааһа Саргылаана Васильева кэпсиир.
Бу курдук, ахсынньыга өрөспүүбүлүкэҕэ кэлбит, аан дойдуга бастакынан оҥоһуллубут 800 устуука «Спутник V» быһыы “кыһыл зонаҕа” үлэлээн, уодаһыннаах вируһу кытары охсуһа сылдьар миэдиктэргэ номнуо бэриллэн бүттэ.
Ангелина Васильева, “Саха сирэ” хаһыат, edersaas.ru
Хаартыска: доруобуйа харыстабылын министиэристибэтин саайтыттан.