АЛРОСА хампаанньа Москватааҕы бөртөлүөт собуота саҥа таһаарбыт тиэхиньикэтин, Ми-38-2 көтөр аалы аҕалан, Мирнэй куорат аэропуордугар тохсунньуга сертификационнай кэтээн көрүүнү ыытыаҕа. Араас бырагырааманан уопсайа 50 көтүүнү оҥоруохтара.
edersaas.ru
М.Л. Миль аатынан Москватааҕы бөртөлүөт собуотун үлэһиттэрэ кэтээн көрүү көтүүтүн оҥоруохтара. Кинилэр бөлөхтөрүгэр лүөччүктэр, конструкторскай бюро тиэхиньиичэскэй уонна инженернэй састааптара киирдилэр. Кинилэр хамаандалара алмаастаах куоракка номнуо көтөн кэллэ.
АЛРОСА авиахампаанньата собуоттан саҥа тахсыбыт көтөр аалы сиргэ көрүөҕэ-истиэҕэ, туох наадалааҕынан хааччыйыаҕа. Ону таһынан, Ми-8 бөртөлүөтүнэн тиэхиньиичэскэй үлэһиттэри таһыаҕа. Билиҥҥитэ Мирнэйдээҕи авиационнай тэрилтэ бөртөлүөтү аэропуорка уонна сиргэ көрөргө дуогабар бэлэмнии сылдьар.
Собуоттан саҥа тахсыбыт Ми-38-2 бөртөлүөтү көтүрэн баран Москваттан Мирнэйгэ «Волга-Днепр» авиахампаанньа «Руслан» сөмөлүөтүнэн аҕалла. Ахсынньы 17 күнүттэн ый бүтүөр диэри собуот үлэһиттэрэ ону төттөрү хомуйуохтара, көтөр аалы таҥыахтара. Онтон төттөрү Москваҕа ыытыахтара.
«Саха сирин мээнэҕэ талбатыбыт. Кыһын манна Уһук хоту оройуоннарыгар -50С диэри ахсынньы туманынан будулуйар аам-даам тымныы түһэр. Бөртөлүөтү көтүтэргэ көҥүллэммит тымныыны куоһаран, хоту дойду тымныы тыйыс усулуобуйатын төһө тулуйарын көрүөхпүт. Онон бастакы көтүүнү боруобалыырга Мирнэй куораты таллыбыт», — диэн иһитиннэрдэ «АЛРОСА» Мирнэйдээҕи авиационнай тэрилтэтин хамандыыра Валерьян Веретенников.
Бөртөлүөччүктэр күн-дьыл туругуттан көрөн, -55С диэри тымныйар Накыыҥҥа хайаны байытар кэмбинээккэ тиийэ сылдьыахтара.
Марианна Тыртыкова, «Саха сирэ», edersaas.ru