Меценат атыыһыт холобурун батыһааччы элбииригэр

Ааптар: 
Бөлөххө киир:

Саха сиригэр үтүөнү оҥоруу, кыамматтарга көмөлөһүү дириҥник үөрэтиллэ илик.

edersaas.ru

Онон үгүс киһи саха меценаттарын, бастыҥ атыыһыттары билбэт. Өймөкөөн улууһугар олорон ааспыт дьадаҥы дьону араҥаччылааччы, кинилэри өйөөччү Николай Осипович Кривошапкин 1832 сыллаахха сэниэ саха ыалыгар күн сирин кербүт.

Норуот этэринэн,  нэһилиэстибэнэн бэриллибит 150 төбө ынах сүөһүнү эдэр сылдьан көрү-нары батыһан, хаартыга умсугуйан барытын ыскайдаабыт. Ол эрээри сотору кэминэн өйүн-төйүн кэмигэр тутан, Дьокуускайтан Охотскайга диэри тууһу таһыы биир барыыстаах хайысхатынан дьарыктанан саҕалаабыт. Кэлин атыылыыр дьоҕура сайдан, билиҥҥи Өймөкөөн улууһун уонна Магадаан уобалаһын арҕаа эҥээринэн, Дьааҥыга, Муомаҕа, Халымаҕа атыыһыттаабыт. Күндү түүлээҕи Дьокуускай атыыһыттарыгар, Г.В. Никифоровка-Манньыаттаах уолугар,  А.И.Громоваҕа, П.А.Кушнаревка туттарара.

Оччотооҕуга сыллааҕы эргиирэ биир мөлүйүөҥҥэ тэҥнэспит атыыһыкка I гильдияны иҥэрэллэрэ. Маннык атыыһыт тас дойдуну кытта эргинэр быраабы ылара. Ол эрээри Ньукулай оҕонньор  онно таласпат этэ.

1860 сыл халыҥ хаар уонна уһулуччу тымныы туран, быстарбыт дьоҥҥо, 23 саастаах эдэр киһи сүөһү түҥэппит. Онон эдэр сааһыттан амарах сыһыанынан биллибитэ. 1880 сыллаахха Мэмээл эбээннэрэ кураан дьылга быстарбыттарыгар аһынан-таҥаһынан көмөлөспүт,  таба атыылаһан биэртэлээбит.

Бэйэтэ аахпат да суруйбат да буолан, олохтоох ыччат үөрэҕи баһылыырыгар олус көмөлөөх этэ. Томторго Таҥара дьиэтин, оскуоланы астарбыт. Дьокуускай куоракка эмиэ оскуола туттарбыта, кыаммат ыал оҕолоро олорон үөрэнэллэригэр анаан пансион тэрийбитэ. Байаҕантай уонна хоту улуустар ыччаттара үөрэнэллэригэр улаханнык көмөлөспүтэ. Итиэннэ наука, культура сайдыытыгар атыыһыт улахан болҕомтотун уурбутун эмиэ бэлиэтиибит.

Үйэ аҥарыттан ордук биир дойдулаахтарын өйөөн-убаан олорбут Өймөкөөн аатырбыт баайа үстэ кэргэннэнэ сылдьыбыта да,  бэйэтин дьыалатын салҕыыр, утумнуур кэнчээри ыччаты хаалларбатаҕа.

2015 сыллаахха Дьокуускайдааҕы 5-с нүөмэрдээх оскуола тэлгэһэтигэр Николай Осипович Кривошапкин пааматынньык-бюһун үөрүүлээх быһыыга-майгыга арыйбыттара. Бу оскуола меценат атыыһыт аатын сүгэр.

Туйаара АНДРЕЕВА, «Саха» НКИХ араадьыйаҕа биэриитин дириэксийэтин

сарсыарааҥы бырагыраамаларын эрэдээктэрэ.

Хаартыска — интэриниэттэн

+1
0
+1
0
+1
0
+1
0
+1
0
+1
0
+1
0