Дьокуускайга А.Е.Кулаковскай аатынан норуоттар доҕордоһууларын дьиэтигэр, оскуола үөрэнээччилэрин сааскы сынньалаҥнарыгар, «Сардаана сибэкки» диэн Дмитрий Наумов остуоруйата көрдөрүлүннэ.
Меценат, предприниматель, «Якутянин года-2018» бириэмийэ хаһаайына Афанасий Алексеев 16:00 чаастан көрдөрүллүөхтээх билиэттэри барытын атыылаһан ылан оҕолорго бэлэх оҥордо диэн норуоттар доҕордоһууларын дьиэтин пресс-сулууспата суруйар. Билиэттэр «Харысхал» аһымал пуондаҕа, «Тэрчи» дьиэ кэргэни өйүүр кииҥҥэ, «Подросток» АСП, «Айхал» оҕо киинигэр, Строительнай уонна Губинскай уокуруктар управаларыгар түҥэтиллибиттэр.
Мюзикл Дмитрий Наумов остуоруйатынан труоруллубут. Бырайыак ааптардара: СӨ норуодунай артыыстара, Екатерина, Алексей Егоровтар салайар «Сырдык сүүрээн» оҕо образцовай эстраднай устуудьуйалара. Премьера 2017 сыллаахха көрдөрүллүбүтэ итиэннэ тута биһирэммитэ. Мюзикл оҕо болҕомтотун тардыан тардар. Манна ураты дьоруойдар, чаҕылхай декорация, сиэдэрэй көстүүмнэр, сардаана сибэкки туһунан олус умсугутуулаах, интэриэһинэй остуоруйа, Кураан Эмээхсин салалталаах үөн-көҥүүр аармыйата хараҥа күүстэр буолаллара, о.д.а. көрөөччүнү сэргэхситэр. Манна кэрэ ырыалар ылланаллара саалаҕа олорооччулары абылыыр уратылаах.
Оруоллары «Сырдык сүүрээн» уонна «Сандал» үҥкүү кэлэктиибин (салайааччы СӨ үөрэҕирии туйгуна Сардаана Катакова) оҕолоро итэҕэтиилээхтик, ис сүрэхтэриттэн наһаа кыһаллан толороллор. Мюзиклга анаан Изабелла Кузьмина эскииһинэн 70-тан тахса көстүүм тигиллибит. Иннокентий Гаврильев-Лэкиэс, Моисей Кобяков, Иннокентий Тытыгынаев суруйбут, музыканан киэргэппит 15 ураты ырыа толоруллар. Поэтесса Саргылаана Гольдерова – Саргы Куо суруйбут хоһооннорун оҕолор кэрэхсии истэллэр. Сценографияны Саха тыйаатырын худуоһунньуга Михаил Егоров оҥордо.
А.Е.Кулаковскай аатынан норуоттар доҕордоһууларын пресс-сулууспата