Тыа хаһаайыстыбатын арыаллыыр бэтэринээринэй докумуон аныгы технологиянан, электроннайдык оҥоһуллар буолбутунан сибээстээн, бэтэринээрдэргэ нэһилиэнньэттэн үгүс ыйытыылар киирэллэр.
edersaas.ru
Ол иһигэр, элбэх ыйытыы ФГИС “Меркурий” диэн бырагыраамаҕа туһуланар. Бу бырагырааманы кылгастык быһаардахха маннык. Бастатан туран, хас биирдии хаһаайыстыба, ол эбэтэр юридическай сирэй, урбаанньыт биитэр чааһынай киһи бу систиэмэҕэ регистрацияланаары логин уонна пароль көрдөөн, бигэргэтиллибит анал былааҥкаҕа сайабылыанньа суруйан, олохтоох улууһун судаарыстыбаннай бэтиринээринэй иниспиэктэригэр биэрэр. Судаарыстыбаннай бэтиринээринэй иниспиэктэр сайыбылыанньаҕа суруллубут чахчылары бэрэбиэркэлээн баран, бу киһини систиэмэҕэ регистрациялыыр. Оччоҕуна, сайыбылыанньаҕа ыйыллыбыт электроннай аадырыска логин уонна пароль ыытыллар.
Иккиһинэн, сайабылыанньаны биэрбит киһи бу логин уонна пароль көмөтүнэн систиэмэҕэ киирэн, үлэтин саҕалыыр. Ол курдук, киирбит табаарын (үүтүн-этин), сүөһүтүн, атын, ытын уонна да атын кыылларын атыылыыр, ханна эрэ илдьэр биитэр аҕалар буоллаҕына, сайаапкатын бу систиэмэ нөҥүө ыытар.
Үсүһүнэн, ол сайаапканы судаарыстыбаннай бэтэринээринэй сулууспа үлэһитэ көрөн баран, барыта сөп түбэһэр буоллаҕына, электроннай бэтэринээринэй докумуону толорон ыытар. Бу барыта компьютерынан оҥоһуллар, инньэ гынан, хайаан да хонтуораҕа тиийэн, бэтэринээринэй исписэлииһи сирэй көрсөн кэпсэтэр ирдэммэт. Хас биирдии тыа хаһаайыстыбатын табаарын оҥорооччу уонна ону туһанааччы бу систиэмэҕэ сатаан үлэлиир буолуохтаах. Туох эмит сатаммат, быһаарыллыбат боппуруос үөскүүр түбэлтэтигэр, ким ханна олорорунан, улуустааҕы бэтэринээринэй управлениеттан ыйытыан сөп. Эбэтэр Бэтэринээрийэ департаменыттан, Дьокуускай куорат Курашов уулуссатын 30/1 нүөмэрдээх дьиэтигэр, 17-с кабинетыгар тиийэ сылдьан, биитэр 42-01-74 нүөмэрдээх төлөпүөнүнэн эрийэн билсиэн сөп. Онно нэдиэлэ үһүс күнүн ахсын, сарсыарда 10 чаастан консультация буолар диэн Бэтэринээрийэ департамена иһитиннэрэр.
Раиса Сибирякова, «Саха сирэ» хаһыат, edersaas.ru