Дьокуускай куорат мээрэ Сардаана Авксентьева муниципальнай бүддьүөт суотугар Опера уонна балет тыйаатырыгар ыытыллыахтаах Саҥа дьыллааҕы корпоративнай бырааһынньыгы тохтотор туһунан быһаарыыны ылыммыта. Ол оннугар отделлар бэйэлэрин күүстэринэн, үптэринэн социальнай тэрилтэлэргэ аһымал акциялары ыытыахтаахтар. Отделлар бу акцияларын мээр солбуйааччылара бэйэлэринэн көҕүлүүллэр, хонтуруоллууллар.
Онон куорат дьаһалтатын үп-экономика блогун үлэһиттэрэ Капитоновкатааҕы кырдьаҕастар, инбэлииттэр интэринээт-дьиэлэригэр тиийэн, аһымал акцияны тэрийдилэр. Кинилэри мээр солбуйааччыта Михаил Воробьев салайан илдьэ сырытта. Үлэһиттэр интэринээт-дьиэ олохтоохторугар улахан тэлэбиисэри уонна хас да дьааһык Саҥа дьыллааҕы минньигэс бэлэхтэри (мандариннары, сакалаат кэмпиэттэри) туттардылар.
Капитоновкатааҕы кырдьаҕастар, инбэлииттэр интэринээт-дьиэлэригэр 250 киһи олорор, 165 киһи үлэлиир. Сүрүннээн көрүүтэ-истиитэ суох хаалбыт, кыаммат буолбут кырдьаҕастар уонна инбэлииттэр олороллор. Кинилэри күннэтэ көрөллөрүн-харайалларын, аһаталларын таһынан, медицинскэй, психологическай, юридическэй өҥөлөрү оҥороллор.
Кырдьаҕастар бэлэхтэртэн олус үөрдүлэр. “Саалаҕа бары мустан киинэ көрүөхпүтүн, караокенан ыллыахпытын, айар киэһэлэри ыытыахпытын сөп буолла”, — диэн кинилэр этэллэр. Кырдьык, киһиэхэ кыра да наада. Оттон кырдьаҕастарга, инбэлииттэргэ ордук болҕомто наада. Онон мээр Сардаана Авксентьеваҕа улаханнык махтаннылар.
Түмүккэ Михаил Воробьев кытаанах доруобуйаны баҕаран туран, үүнэн иһэр Саҥа дьылынан, Ороһуоспанан эҕэрдэлээтэ уонна интэринээт-дьиэҕэ элбэхтик кэлиэм, сибээһи тутуһа туруом диэн эрэннэрдэ.
Бу иннинэ мэрия отделларын үлэһиттэрэ Өрөспүүбүлүкэтээҕи кырдьаҕастар, инбэлииттэр интэринээт-дьиэлэригэр уонна тулаайах, көрүүтэ-истиитэ суох хаалбыт оҕолор олорон үөрэнэр 28 №-дээх адаптивнай интэринээт-оскуолаларыгар аһымал акциялары, бырааһынньыктары тэрийбиттэрэ.
Маннык акциялар өссө да салҕанан бараллар. Куорат дьаһалтатын үлэһиттэрэ атын тэрилтэлэргэ бэйэлэринэн үтүө холобуру көрдөрөллөр.
Ангелина Васильева, “Саха сирэ” хаһыат, edersaas.ru