Мэҥэ Хаҥаласка «Төрөппүт сүбэтэ» диэн уопсастыбаннай тэрилтэ тэрилиннэ
Муус устар 6 күнүгэр Мэҥэ Хаҥалас улууһугар, Майа сэлиэнньэтигэр Р.Г.Васильев аатынан кыраайы үөрэтэр түмэлгэ үөрэх управлениетын тэрийиитинэн төрөппүттэр улуустааҕы сүбэ мунньахтара буолла.
Үөрэх управлениетын иитэр үлэҕэ салаатын үлэтин начальнига Марианна Билюкина төрөппүтү кытта үлэ сүрүн хайысхаларын билиһиннэрэн, туох үлэ-хамнас ыытылларын кэпсээтэ.
Сокуоннай саастарын туола илик оҕолор буруйу оҥорууларын туһунан бу салааны сүрүннүүр отдел исписэлииһэ Ньургуйаана Варламова чахчыларга олоҕуран иһитиннэрдэ. Онно, хомойуох иһин, кыыс оҕо бэрээдэги кэһиитин ахсаана улаата турарын бэлиэтээтэ.
«Кэскил» киин психолога Нина Слободчикова билиҥҥи кэмҥэ оҕо-ыччат, төрөппүт, уһуйааччы олоххо сыаннастара диэн тиэмэни арыйда. Күн бүгүн оҕо, төрөппүт, педагог уонна учуутал олох ханнык сыаннастарын чорботоллорун итиэннэ ханныктары кэнники күөҥҥэ туталларын холобурдары аҕалан туран кэпсээтэ.
Бэдьимэ оскуолатын төрөппүттэрин кэмитиэтин чилиэннэрэ бу күн сарсыардаттан түмэл дьиэтигэр алгыстаах алаадьы астаан, ыалдьыттары, сүбэ мунньах кыттыылаахтарын күндүлээтилэр, алаадьы сытынан ыраастаан арчылаатылар. Нэһилиэккэ орто оскуола, нэһилиэк салалтата, түөлбэлэр кыттыһан иитэр эйгэни тэрийиигэ «Дьөһүөл» тосхолу хаһыс да сылын үлэлэтэллэр. Оҕо иитиитигэр биир ситимнээхтик баай уопуттарын дириэктэри иитэр-үөрэтэр үлэҕэ солбуйааччы Екатерина Попова уонна төрөппүттэр кэпсээтилэр.
Павловскай орто оскуолатын дириэктэрин иитэр-үөрэтэр үлэҕэ солбуйааччы Татьяна Оконешникова Нөөрүктээйи нэһилиэгэр иитии биир кэлим ситимин тэрийиини сырдатта.
«Төрүччү педагогикатын» туһунан дьиэ кэргэн педагога Любовь Платонова билиһиннэрдэ. Өбүгэлэр оҕону иитиигэ мындыр ньымаларыгар, норуот педагогикатыгар бэрт интэриэһинэй кэпсэтиини таһаарда.
Сүбэ мунньах түмүгүнэн төрөппүт улуустааҕы сүбэтин таллылар. Сүбэҕэ Аллараа Бэстээхтэн Сергей Федорович Шарины, Нөөрүктээйиттэн Ирина Николаевна Кириллинаны, Майаттан Анна Владимировна Тарасованы уонна Зоя Афанасьевна Герасимованы таллылар. Үөрэх управлениетын иһинэн тэриллибит бу саҥа уопсастыбаннай тэрилтэ оҕону иитиини, төрөппүтү кытары үлэни сүрүннэһиэҕэ.
Зоя ГЕРАСИМОВА.