Дойду салалтата сиртэн үүнээйини ылыыга, ол иһигэр сири-уоту тупсаран оҥорууга, мелиорацияҕа улахан болҕомтотун уурар.
edersaas.ru
Быйыл мелиорация үлэтигэр министиэристибэ 8,5 миллиард солкуобай харчыны көрдө, ити ааспыт 2019 сыллаахха көрүллүбүт субсидияттан 10,4 %-ынан элбэх. «Арассыыйа мелиоративнай комплексын сайыннарыы» биэдэмистибэннэй бырагырааманан былырыын 5,7 миллиард солкуобай көрүллүбүтэ, ону таһынан «АПК бородууксуйатын экспортка таһаарыы» федеральнай бырайыак чэрчитинэн 2 миллиард солкуобай тыырыллыбыта. Быйыл бу икки хайысханан туһааннааҕынан 6,2 миллиард солкуобай уонна 2,3 миллиард солкуобай көрүлүннэ.
Тыа хаһаайыстыбатын миниистирин солбуйааччы Ольга Гатагова этэринэн, нүөлсүтэр кэми таба туһаныы итиэннэ былааннаммыт мелиоративнай үлэлэри толору тэрийии сиртэн үүнээйи ылыы салаатыгар түһэриллибит бородууксуйаны ылыы сорудах толорулларын мэктиэлиир. Онон, АПК эрэгийиэннэрдээҕи салалталара судаарыстыба субсидиятын тустаахтарга кэмигэр тиэрдэргэ үлэлиэх тустаахтар.
— Судаарыстыба көмөтө бастатан туран, тыа хаһаайыстыбатын табаарын оҥорооччулары өйүүр, ас-үөл сыанатын хонтуруоллуур, нэһилиэнньэ дьарыктаах буолуутугар кыаҕы биэрэр итиэннэ Арассыыйа Федерациятыгар аһылык өттүнэн куттал суох буолуутун Доктринатын олоххо киллэриини хааччыйар, — диэн миниистири солбуйааччы тоһоҕолоон бэлиэтээбитин туһунан Арассыыйа Федерациятын Тыатын хаһаайыстыбатын министиэристибэтин пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru