Мэҥэ-Хаҥалас улууһун 272N-дээх Мэлдьэхситээҕи быыбардыыр учаастагар, РФ Конституциятыгар уларытыылары киллэриигэ куоластааһын бэс ыйын 25 күнүттэн саҕаланна.
Пандемия кэмэ буолан, кулууп дьиэтэ эрдэттэн дезинфекцияланна, куоластааччыга сөптөөх усулуобуйа тэрилиннэ. Хас биирдии киһи киирэригэр температурата мээрэйдэнэр, илиитэ дезинфекцияланар, мааска, бэрчээкки, уруучука бэриллэр. Дьон ыйынньык бэлиэнэн киирэр, куоластаан баран, атын анал аанынан тахсар.
Мэлдьэхси нэһилиэгэр (баһылык В.Г.Никифоров) испииһэккэ киирбитинэн 330 куоластааччы баар. Быыбардыыр хамыыһыйа, ким эрдэ куоластыан баҕалаахтарга, дьон үтүрүспэтин диэн, уулуссанан арааран, куоластааһыны саҕалаата.
Дьиэҕэ куоластыырга сайабылыанньанан графигынан сылдьыахтара. Куоластааһын хаамыытын, ирдэбили тутуһууну кэтээн көрөөччүлэр, графигынан үлэлэрин саҕалаатылар.
Быыбардыыр хамыыһыйа бэрэссэдээтэлэ Ольга Дьяконова, солбуйааччы бэрэссэдээтэл Любовь Степанова, сэкэритээр Мария Григорьева, чилиэннэр Саргылаана Плотникова уонна Саргылаана Колесова.
Бүгүҥҥү туругунан 30 киһи куоластаата. Дьиэҕэ куоластааһыҥҥа 23 киһи сайабылыанньа суруйда. Ити курдук, Быыбардыыр учаастак бүгүҥҥүттэн үлэтин саҕалаата, куоластааһын салҕанар.
Надежда АНДРОСОВА,
Мэҥэ-Хаҥалас, Мэлдьэхси
Сүрүн хаартыскаҕа: Бастакы куоластааччы В.П.Аргунов.