Мэлдьэхсигэ үҥкүү бырааһынньыга
Олох-дьаһах

Мэлдьэхсигэ үҥкүү бырааһынньыга

Академик Афанасий Чугунов аатынан Мэлдьэхси орто оскуолатыгар кылаас салайааччылара, төрөппүттэр ыкса сибээстээхтик бииргэ үлэлээбиттэрин түмүгэр, Үҥкүү аан дойдутааҕы күнэ үрдүк тэрээһиннээхтик ыытылынна.

Бу күн бииртэн биир кэрэхсэбиллээх үҥкүүлэр көрдөрүлүннүлэр, төрөппүттэр оҕолор көстүүмнэрин тигэн, күүс-көмө буолбуттара харахха быраҕыллар. Үҥкүүлэри төрөппүттэр Анна Сосина, Мария Куприянова, уһуйаан үҥкүүгэ салайааччыта Нарыйа Попова туруордулар. Ыаллыы сытар Бэдьимэ оскуолатын үҥкүүгэ ансаамбыла кэнсиэри ситэрэн биэрдэ, онон көрөөччү биһирэбилин ылыахтарын ыллылар. Дьүүллүүр сүбэҕэ үлэлээбит идэтийбит хореографтар: Майаттан Василий Оконешников, Бэдьимэттэн Лукерья Аргунова, сцена бэтэрээнэ Лидия Аянитова сыаналаатылар.

Кэнсиэр түмүгүнэн «Бастыҥ туруоруу” анал ааты 6 кылаас Анна Сосина туруоруутугар «Хотугулуу үҥкүүтүнэн” ылла (кылаас салайааччыта Саргылаана Плотникова). 3 миэстэни — 2 кылаас Анна Сосина туруоруутугар “Киргизскэй үҥкүүнэн”, 2 миэстэни — 1 кылаас Нарыйа Попова туруоруутугар “Испанскай үҥкүүнэн” (кылаас салайааччыта Лена Сивцева), 1 миэстэни 5 кылаас Мария Куприянова туруоруутугар араас норуоттар үҥкүүлэринэн (кылаас салайааччыта Ольга Семенова) ыллылар.

Кылаан бирииһи 10 кылаас «Индийскэй үҥкүүнэн» ылыан ылла. Бу үҥкүүгэ кылаас салайааччыта Изабелла Степанова оҕолорун кытта бииргэ үҥкүүлээн көрөөччү кэрэхсэбилин ыллылар. Оҕолор кыра саастарыттан үҥкүүлүүр буоланнар, көрөөччүлэр дохсун ытыс тыаһынан махтаннылар.

Ити курдук, Үҥкүү бырааһынньыгын оскуола дириэктэрин иитэр үлэҕэ солбуйааччы Юлия Петрова иилээн-саҕалаан ыытта. Түмүккэ үҥкүү туруорааччыларга махтал суруктары туттардылар. Үҥкүү бырааһынньыгыттан бары дуоһуйа сынньанан тарҕастылар.

Ньургуйаана СКРЯБИНА-САЙДЫЫНА, “Саха сирэ”, edersaas.ru анаан

2
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

11 + 3 =