Тохсунньу 22 күнүгэр Булуҥнааҕы айылҕа харыстабылын инспекциятын үлэһиттэрэ түлүрбэҕи (мэкчиргэ ууһугар киирэр көтөр) иитэр Мира Гладышеваны кытта көрүстүлэр. Мира бу көтөрү ииппитэ сыл аҥаара буолла. edersaas.ru
Мира кэпсииринэн, кини мэкчиргэни ааспыт сыл атырдьах ыйыгар Тикси-3 бөһүөлэк таһыгар сынньана сылдьан булбут. Мэкчиргэ уйата чугаһынан көстүбэт эбит, эбиитин ыалдьыбыт көрүҥнээҕин аһыммыт уонна дьиэтигэр илдьэ барарга санаммыт. Мира бэтэринээр идэлээх буолан көтөрү эмтээбит, көрбүт-харайбыт. Икки нэдиэлэнэн мэкчиргэ түүтэ хойдон, көтө сатыыр буолбут.
Мэкчиргэ хаһаайына көтөрүгэр Сява диэн ааты иҥэрбит, дьиэтигэр биир хоһу анаабыт. Сява эт уонна моркуоп аһылыктаах эбит.
Олунньу 1 күнүгэр Сяваны «Орто Дойду» зоопаркаҕа аҕалыахтара.
Түлүрбэх (нууч. болотная сова) — мэкчиргэлэр кэргэннэригэр, кулгаахтаах мэкчиргэлэр уустарыгар киирэр көтөр. Өҥө араҕас, көхсө кытархайдыҥы хоҥор. Уһук хотуттан ураты Саха сирин барытыгар тарҕанан үөскүүр.
Айтана Аммосова, edersaas.ru