“Саха сирэ” хаһыат бэтэрээнэ, суруналыыстыкаҕа судаарыстыбаннай бириэмийэ лауреата, СӨ култууратын үтүөлээх үлэһитэ Прокопий Иосифович Караканов-Бурдук Буокай төрөөбүтэ 85 сылын былырыын бэлиэтээбиппит.
Кини аатын сүгэр Амма улууһун Мээндиги нэһилиэгин оскуолатыгар бүгүн, Билии күнүгэр, мемориальнай дуосканы арыйыы сиэрэ-туома ыытылынна. “Саха сирэ” хаһыат кылаабынай эрэдээктэринэн үлэлээбит, билигин Эмис нэһилиэгин баһылыга Прокопий Петрович Бубякин бу мемориальнай дуосканы оҥоттордо. Санатан эттэххэ, “Саха сирэ” уонна “Амма олоҕо” хаһыаттар тиһигин быспакка “Караканов ааҕыыларын” Мээндиги оскуолатыгар ыыппыттара 10-тан тахса сыл буолла. Бу Бурдук Буокай сырдык аатын, үлэтин үйэтитиигэ туһуланар. Прокопий Петрович бэлиэтээбитинэн, Аммабыт биир чулуу киһитэ, суруналыыс Бурдук Буокай баҕарбыт баҕата туолан, Амма бурдуга киһи сиир бурдуга хаһан эмэ буолуоҕа, ону туһулаан үлэлээһин билиҥҥи көлүөнэ үөрэнээччилэргэ, учуонайдарга, специалистарга дьоһун сыал-сорук буолуох этэ.
Прокопий Иосифович кэргэнэ Ульяна Егоровна Караканова үөрүүлээх быһыыга-майгыга кытынна. Быйыл Мээндиги оскуолатыгар үлэлии кэлбит эдэр учууталлары эҕэрдэлээтэ. Кини нэһилиэк дьаһалтатыгар, оскуолаҕа бэлэхтэрин туттартаата. Быйыл саҥа анаммыт дириэктэри Иосиф Софроновы ситиһиилээх үлэҕэ алҕаата.
edersaas.ru