Сарсыҥҥыттан Дьокуускайга өрөспүүбүлүкэ волейболга бастакы лигатын чөмпүйэнээтэ саҕаланар. Быйылгы күрэхтэһии түмүгүнэн атырдьах ыйыгар Аммаҕа ыытыллар Саха сирин норуоттарын VII Спортивнай ооонньууларыгар ханнык улуустар хамаандалара кыттыахтара биллиэҕэ.
Эр дьоҥҥо күүстээх оонньооччулардаах Ленскэй, Нам, Амма хамаандалара кыайыыга эрэ суоттаналлара эрэбил. Уус Алдан, Мэҥэ Хаҥалас, Чурапчы волейболистара эмиэ мэтээлгэ чарапчыланаллара сэрэйиллэр. Мирнэйдэр даҕаны си-дьүгээр буолбаттара буолуо диэн баар.
Дьахталларга Амма, Нам, Мирнэй, Өлүөхүмэ, Үөһээ Бүлүү, Дьокуускай, Сунтаар улуустарын хамаандалара күөн көрсүөхтэрэ. Манна сүрүн киирсии Амма уонна Дьокуускай хамаандаларын икки ардыларыгар барара сабаҕаланар. Санатан эттэххэ, аммалар түөрт сыллааҕыта Намҥа ыытыллыбыт Оонньуулар кыайыылаахтарынан буолаллар.
Волейболу сэҥээрээччилэри бастакы лига чөмпүйэнээтигэр олунньу 15-18 күннэригэр “Кыайыы 50 сыла” Спорт дыбарыаһыгар күүтэллэр.
Кэлэр нэдиэлэттэн манна иккис лига хамаандаларын чөмпүйэнээтэ саҕаланыаҕа. Онно эмиэ Амматааҕы Оонньууларга путевкалар иһин сытыы киирсиилэр буолаллара күүтүллэр.
Роман Попов, “Саха сирэ” хаһыат, edersaas.ru