Дмитрий Медведев оҕо босуобуйатын 50 солкуобайтан 10 тыһыынчаҕа диэри үрдэттэ
Владимир Путины кытта быһа сибээскэ бэриллибит өссө биир ыйытыы быһаарылынна. Арассыыйа премьер-миниистирэ Дмитрий Медведев, оҕо балтараа сааһыттан үс сааһыгар диэри босуобуйатын 50 солкуобайтан 10 тыһыынча солкуобайга диэри үрдүө диэн кэпсээтэ. Ол эрээри маны тиийиммэт-түгэммэт эрэ ыаллар ылыахтара.
Демографияҕа Арассыыйа сайдыытын национальнай сыалларын ситиһиигэ анаммыт мунньахха Дмитрий Медведев дьиэ кэргэн наадыйыытыгар биир киһиэхэ көрүллэринэн тиийинэн олоруу алын кээмэйэ балтарааттан иккигэ диэри үрдүүрүн туһунан сокуон барыла бэлэмнэммитин туһунан иһитиннэрдэ. Маны бастакы уонна иккис оҕоҕо судаарыстыбаттан ыйдааҕы өйөбүлү ылааччылар ахсааннарын элбэтэр туһугар оҥоһуллар, диэн “Интерфакс” этэр.
Медведев инбэлиит оҕолорун биэбэйдиир үлэлиир саастаах үлэлээбэт төрөппүттэргэ толуйуу төлөбүрүн кээмэйэ икки төгүл үрдээтэ диэн бэлиэтээтэ. Уонна бу 2019 сыл от ыйын 1 күнүттэн олоххо киириэҕэ.
Уһук Илин төрөппүттэригэр анаан-минээн бастакы оҕолоро төрөөтөҕүнэ оҕоҕо тиийинэн олорор алын кээмэйиттэн икки төгүл улахан кээмэйдээх биир кэлим төлөбүрү киллэрдилэр. Ону тэҥэ Уһук Илиҥҥэ эрэгийиэннээҕи Ийэ хапытаала иккис оҕо төрөөһүнүгэр олохтоммута. Медведев бигэргэтэринэн, Уһук Илиҥҥэ үһүс уонна онтон төрүүр оҕолорго ыйдааҕы төлөбүргэ федеральнай бүддьүөттэн кыттыгас үбүлээһин Бурятияны, Саха сирин, Сахалины уонна Чукотканы киллэрэн туран, салҕаныаҕа.
Маны тэҥэ, Арассыыйа бырабыыталыстыбатын баһылыга балтараа сыл анараа өттүгэр Арассыыйаҕа төрөөһүнү элбэтиигэ ылыныллыбыт демографическай улахан бакыат толору үлэлээбэтин бэлиэтээтэ. Медведев маны көннөрөргө ыҥырда. Бастакы оҕо төрөөһүнүгэр эбэтэр иитэ ылыыга Ийэ хапытаалыттан иккис оҕоҕо төлөөһүҥҥэ ыйдааҕы төлөбүрдэр туһунан санатан туран. Бу төлөбүрдэр 2021 сылга диэри, ону тэҥэ үһүс уонна итинтэн салгыы төрүүр оҕолорго төлөбүрдэргэ эрэгийиэннэргэ субсидиялар уһатыллыбыттара.
Арассыыйа бырабыыталыстыбатын баһылыга өлүүнү аччатыыга уонна мэдиссиинэ көмөтүн хаачыстыбатын үрдэтиигэ улахан болҕомтотун уурда. Кини тас биричиинэлэртэн сибээстээх өлүүлэри аччатарга уонна ыарыыны утары охсуһарга эттэ. Итилэр истэригэр – массыына саахалыттан өлүү, экология сабыдыала. Дмитрий Медведев чөл аска, чөл олоххо болҕомтону уурарга туһаайда, диэн Вести.ру иһитиннэрэр.
edersaas.ru