Медведев кэлэр өттүгэр дьиэни өлүүлэһэн тутууттан олоччу аккаастанарга ыҥырда
РФ премьер-миниистирэ, “Биир ньыгыл Арассыыйа” баартыйа бэрэссэдээтэлэ Дмитрий Медведев өлүүлэһэн туттарыыга дьон албыннаппатын туһугар бу ньыматтан олоччу акаастанарга ыҥырда.
edersaas.ru
Бу туһунан кини быраабы араҥаччылыыр холбоһуктар уонна уопсастыбаннай диэйэтэллэр бэрэстэбиитэллэрин кытта көрсүһүүгэ эттэ, диэн ТАСС иһитиннэрэр.
“Дьиэни өлүүлэһэн тутуу маннык үнүстүтүүтэ ураты быһыылаах уонна биһиги дойдубутугар эрэ баар, — диэн Медведев бэлиэтиир. – Биһиги инники өттүгэр маннык өлүүлэһэн тутууттан аккаастаныахтаахпыт, оччоҕо эрэ албыннаппыт дьон суох буолуутун мэктиэлиэҕэ”.
Премьер өлүүлэһэн үбүлээһин схематын туһанан эмсэҕэлээбит дьон ахсаана элбэҕин, кинилэр бэйэлэрин бырааптарын чөлүгэр түһэриини кэтэһэллэрин бэлиэтээтэ. Кини бу хайысхаҕа уопсастыбаннай тэрилтэлэр ыытар үлэлэрэ улахан туһаны аҕаларын бэлиэтээтэ. “Онон билигин, чуолаан, “Биир ньыгыл Арассыыйа” баартыйа көмөтүнэн маннык хобдох түгэннэр тахсыбаттарын туһугар улахан болҕомтону туһаайыахтаахпыт”, — диэтэ Медведев.
Өлүүлэһэн тутуу ньымата киирэригэр тутар тэрилтэлэр үптэрэ-астара суоҕа, кирэдьиит ыстаапкатын таһыма уо.д.а. сабыдыаллаабыта диэн премьер билиннэ.
СӨ Ил Дарханын уонна СӨ Бырабыыталыстыбатын пресс-сулууспатын саайтыттан
Женни Стрюкова бэлэмнээтэ