Медицина национальнай киинигэр ыарыһахтары көрүүгэ уларыйыылар киирдилэр
Өрөспүүбүлүкэ вице-премьерэ иһитиннэрбитинэн, кулун тутар 23 күнүттэн, Саха сирин балыыһаларыгар уонна поликлиникаларыгар ыарыһахтары эрдэттэн былааннаммыт көрүүлэр тохтотуллаллар.
edersaas.ru
Коронавирус тарҕаныытын таһаарбат туһугар, Медицина национальнай киинин Перинатальнай киинигэр төлөбүрдээх өҥөлөр, гинекология отделениетыгар эмтэнээччилэр киириилэрэ (эрдэттэн былааннаммыттар), ыарыһахтары аан бастаан көрүү быстах кэмҥэ тохтотуллаллар.
Оттон эмтиир тэрилтэлэр суһал мэдиссиинискэй көрдөрүүнэн ыыппыт ыарыһахтарын гинекология отделениетыгар быраастар көрүөхтэрэ-истиэхтэрэ, салгыы хайдах эмтэнэри чопчулуохтара.
Ону сэргэ, улахан дьоҥҥо уонна оҕолорго диспансеризацияны ыытыыны, көһө сылдьар мобильнай биригээдэлэр айанныылларын, Медицина национальнай киинигэр ыарыһахтары ылыыны быстах кэмҥэ хааччахтыыр туһунан дьаһал таҕыста.
Ыйытыыларгытын Медицина национальнай киинин 741315 нүөмэригэр, “суһал сибээскэ” тахсан билсиҥ.
Надежда ЕГОРОВА, “Саха сирэ” хаһыат, edersaas.ru