От ыйыттан аан дойдуга коронавирус саҥа инфекциятын долгуна саҕаламмыта. Сорох дойдуларга ыарыы өрө туран баран арыый намыраабыт буоллаҕына, Арассыыйаҕа ити долгун саҥа саҕаланар.
Саха сиригэр, атырдьах ыйын 5 күнүнээҕи туругунан, 304 киһи коронавируска сыһынна. “Омикрон” ВА.4 и ВА.5 геноварианнара тарҕанар.
Өрөспүүбүлүкэ мэдиссиинискэй тэрилтэлэрэ күүһүрдүллүбүт эрэһиимҥэ киирдилэр. Саҥа штамм кэлиитин биир төрүөтүнэн омук сириттэн уонна РФ атын субъектарыттан дьон Ковид-19 инфекцияҕа сыстан кэлэллэрэ буоларын СӨ Роспотребнадзор управлениета бигэргэтэр.
Управление исписэлиистэрэ тоһоҕолоон бэлиэтииллэринэн, ыарыы өрө турарын бопсор уонна нус-хас олоххо төннөр соҕотох ньыманан быһыыны ылыы буолар.
Ыарыыга сыстыы ахсаанын уонна вирус тарҕанарын бопсор туһугар кэлэктиибинэй иммунитет үөскүүрэ наада. Киһи аймах устуоруйатыгар ыарыыны маассабай быһыыны ылыы эрэ тохтоппута баар суол. Атыннык эттэххэ, вакцина уопсастыбаны харыстыырга көмөлөөх.
“Омикрон” саҥа штамма үксүгэр ОРВИ курдук биллэрэр, нэһилиэнньэ кэбирэх араҥатыгар кутталы үөскэтэр.
Ыарыыга сыстар кутталы аҕыйатар туһугар дьон элбэхтик сылдьар сиригэр уонна уопсастыбаннай тырааныспарга маасканы кэтэргэ, илиини кичэллээхтик сууна сылдьарга сүбэлииллэр.
Кэнники кэмҥэ мааска, быһыыны ылыы туһунан санатыы аҕыйаабытын да иһин, хас биирдии киһи бэйэтин бэйэтэ харыстанар, быһыы уонна ревакциянация туһунан толкуйдуур.
Надежда ЕГОРОВА, «Саха сирэ», edersaas.ru