Доруобуйа Суолталаах

Мэдиссиинискэй үөрэх кыһаларыгар былырыыҥҥытааҕар элбэх миэстэ бэрилиннэ

2022-23 үөрэх дьылыгар Арассыыйа мэдиссиинискэй үрдүк уонна орто үөрэҕин кыһаларыгар Саха сириттэн кэлээччилэргэ 866 тус сыаллаах миэстэ (былырыыҥҥытааҕар 244-нэн элбэх) бэрилиннэ.

edersaas.ru
Бу туһунан СӨ доруобуйа харыстабылын миниистирэ Лена Афанасьева өрөспүүбүлүкэ бырабыыталыстыбатын бэрэссэдээтэлэ Андрей Тарасенко мунньаҕар иһитиннэрдэ.

«Биһиги тус сыаллаах миэстэ ахсаанын элбэтэбит. Онуоха ураты миэстэни устудьуоннарга үөрэҕи бүтэриэхтэригэр диэри болҕомтону уурарга көрдөһөбүн. Тус сыаллаах дуогабар үөрэҕи бүтэрбит киһи өрөспүүбүлүкэҕэ төннөрүн эрэ мэктиэлиэ суохтаах. Ону таһынан тустаах өйөбүл бары миэрэлэри  тутуһан (олорор дьиэнэн хааччыйыыттан саҕалаан, идэни баһылыырыгар тиийэ),  балыыһаҕа сыһыарыыны эмиэ мэктиэлиэхтээх. Мантан да атын соруктары өрөспүүбүлүкэ Ил Дархана Айсен Николаев туруорар. Мин саныырбынан, манна доруобуйа харыстабылын уонна үөрэх, наука министиэристибэлэрэ эрэ буолбакка, дьарыктаах буолуу судаарыстыбаннай кэмитиэтэ итиэннэ балыыһалар кылаабынай быраастара көхтөөхтүк кыттыһыахтаахтар», -– диэтэ Андрей Тарасенко.
Саха сиригэр мэдиссиинэ саҥа кииннэрэ арыллалларын уонна үрдүк технологиялаах аныгы тэриллэр ылылларын учуоттаан, бу үлэ хабаана кэҥиэҕэ.
Тус сыаллаах квота идэни ылыы бырагырааматынан 271 миэстэҕэ, ординатураҕа 150 миэстэ уонна орто үөрэх бырагырааматынан 445 миэстэ бэриллэр.
Билиҥҥи туругунан, мэдиссиинискэй каадырдары Арассыыйа 12 үрдүк үөрэҕин кыһатыгар (ол иһигэр, ХИФУ медиссиинискэй институтугар) бэлэмнииллэр. Ону таһынан Дьокуускайдааҕы, Алданнааҕы, Нерюнгритааҕы мэдиссиинискэй кэллиэстэргэ уонна Жатайдааҕы техникумҥа эмчит идэтин ылаллар.
Өрөспүүбүлүкэ тус сыаллаах миэстэтинэн үөрэнэн  бүтэрбиттэр эрэгийиэннээҕи Доруобуйа харыстабылын министиэристибэтин анааһынынан 3 сыл үлэлиир эбээһинэстээхтэр.
Бэлиэтээн эттэххэ, федеральнай бырабыыталыстыба тус сыаллаах үөрэххэ былырыыҥҥыттан саҥа быраабылалары киллэрбитэ. Ол быһыытынан,  тус сыаллаах бырагырааманан киирээччини кытары дуогабар түһэрсибит тэрилтэлэр үлэҕэ ылартан аккаастанар түбэлтэлэригэр кини үөрэҕин ороскуотун төлүөхтээхтэр.

Надежда ЕГОРОВА, «Саха сирэ», edersaas.ru

 

 

0
0
Telegram Whatsapp